وإذ بالعمر جاب النُص .. أحمد أسامة

وإذ بالعمر جاب النُص

وإذ بالشيء لشيء ضده

وإذ كل اللي كان اكبر من الماضي..

صَبح قدّه

فَمات اللي انسرق راضي

وبات اللي اعترف..ماضي

وذات اللي اقترف هادي..

وغيره بتنقطع يَدّه

وإذ كل اللي كان..أصبح

فأصبح يستحيل عَدّه

ومن بَعده...

والأب شايب روحه فـ اللفّة

وحفيده خطّى العتبة للستين

نصبوا الميزان عِشرة سنين كفّة

وفـ كفّة تم الشَهر ليِه شهرين

طَب اللي كان أول لُقاه بزفّة

خَف اللي جاب مَهر الضنا بالدين

نُص البشر بتموت وهما عيال

كل البشر قسموا الحياه نصّين

فين اللي كانوا لما كان همّك

بنت الجيران والامتحان بُكرة

لو علّموك تعرف تحب ازاي

بعد امّا راحوا..علّموك تِكره

نص البشر بعد الغياب نسّاي

كل البشر حافظ لرابع جِد

عِد اللي ماتوا من صواني الشاي

ع اللي اندلق من كوبايات الوِد

نص البشر رايح لنص الجاي

كل البشر ليهم فـ حزنك يَد

قَدّ اللي راح يمكن مافيش قدّه

كان عود وناشف والزمن هدّه

نُص البشر من نصّها بتاخد

كل البشر مابيعرفوش يدّوا

كل اللي كان أول مالوش آخر

أصبح..فأصبح يستحيل بَعدُه