سرق الرصيف عمرها... محمد السيد
سرق الرصيف عمرها
خلاها فوق السن
ملامحها رافضة تحن
واتكرمشت بدري
صوتها اللي طول عُمره
بيغني للخـُضرة
وينادي طوب الأرض
مبقاش يسّــمع حد
دبلت عنيها السود
بس الخضار طازة
مابقتش متغاظة..
م الدنيا زي زمان
مش فارقة برد الشتا
لو قلبها دفيان
و مابين خطاوي الناس
دايما بتلقي مكان
وبيبقي في الامكان
تكسَر عيون الذل
ده الرزق لو للكل
بيميل على الشقيان
لا يمل.. لا يحوِّد
يومها اللي أبيض قوي
متحني بالاسود
لكنها بتقدر..
تخلقلها ألوان
