مسدس خرز .. شعر شروق نبيل
مع إني مش ديماً جرئ لكن خلاص ضاقت أوي
وإستحكمــِت في القفل علي قلبي الضعيف
وقعدت وحدي أفتكر
من كام سنة كان شكلي إيه ؟!
الواد " فــُلان "
كـُنا زمان نلعب سوا بالكورة في النادي القديم
عدّي عليا من يومين
وفــِ إيده حتّة من القمر
بنوته أشبه بالملاك
قالي ياصاحبي
شوفت آخرت صبري إيه ؟!
ماعرفش ليه صبري نــَفد
لحظتها و الدمع الغبي أصرّ يفضح كسرتي
كــُل العيال إتجوزت وأنا إرتبطت بوحدتي
من كام وَجع
كانت ملامحي كتير بتشبه للحياة
ماعرفش إيه كل السواد اللي مخبّي عيوني دا
يمكن سهر !
يمكن صراعي مع الصداع
أنا مافتكرش فــَ مرّة سابني من سنين
يمكن قصيدة كتمتها مكتبتهاش
لا يكون حنين !!
ماعرفش ليه شكلي بقي معجّز كده
لا بتاع مشاكل ولا حتّي ليّا في العـَوَج
آخر صراع فــِ الدنيا دي
كانلي في حوش المدرسه
بستعرض الجسم العــَفي
علشان عيون البنت ( س ) تضحك وبيّا تكتفي
كان بس حــِلمي أفوز لمرة بقلبها
معرفش مين كتّــف لساني وقتها خلاني أسكت
يا كل خــُصلة فـِ شـَعرها شبـَـكـِت بقلبي
وكعبلتني قصاد عنيها
أنا مش ناسيها
العيد خلاص قرّب أوي
مابقتش بستطعم فــَرح
مشتاق لشكلي بلبس ظابط
و مسدسي المليان خرز
مابقتشي أحط البدله جنبي عَ السرير
وأحضر بروفة حــِلم للمشهد
بأشهد بإني الآن خلاص
هــَتمّ عـــُـمر من الوَجع
