زي الندى ... شعر أسامة الطحان
زي الندى
لما الندى
ينعس على
صدر النجيل
باتنفسك
وبكف قلبي
المستحيل يتحسَّسِك
باتحسَّسِك
واهرب ف روحك
لما روحي تنتحب
من غير سبب
واحضن مخدَّات الوجع
واتلمِّسك
وافرد ف شريانك فراشات
الربيع التايهه من نوحي
واتوه كمان ف الرفرفه
مااعرفش ليه حضن الفراش
معجون دفا
وحضن قلبك بالصفا
فايض صفا
وانا قلبي عطشان مااكتفى
يا كل أحلامي اللي لسه
ف الخفا
أنا قلبي قابل إننا ف وسط
الزحام
نصبح كما فردين حمام
تاهوا عن السرب المهاجر
للقمر
واتونسوا على طرف حلم
بخيل
أنا قابل أكون لك نيل
أسقيكي من نبع العسل
شهدي
واغسل كفوفك بالزلال
السلسبيل
قابل أميل
واسلت لك الصبح اللي
متلخلم ف ديل الليل
قادر أكون لك سيل
أسقي الشراقي جوه
قلبك ضي
وارسم على كفوفك بالحنه
من دمي
واكسيكي من جلدي ولحمي الحي
ياحلم متخفي ف حنايا الروح
ضمي النهار الجي
وادعي لي من قلبك قبل
النهار مايروح
