كف الرحمة ... شحاتة فكري
مهداه إلي والدتي الحبيبة ..
كلام الدنيا لو يكفي أنا اوفيِّ
وأكتب يامَّا فـ اوصافك
لكنه بجد ما بيكفيش
فمهما كتبت ما موفيش
هعديلك بحور الشعر والكلمة
وادوَّر في معانيها
ولو قلب البحـور ضلمـة
هشوف حبك دليل فيها
واجبلك م المحار معنى
لأوصافك يكون كافي
يا كف الرحمة في الزحمة
وبتطبطب على اكتافي
يا نور عيني وتكويني
يا نبع من الحنان صافي
مانا شبهك
وانا منك
وأوصافك تدوب فيا
تشكل كل أوصافي
يا معنى القوة والفرحة
في وقت الضعف والأحزان
رضاكي الرحمه والجنة
وعند اعتابك العنوان
وِكُوْنِي في الحياه عايش
وِكُوْنِي في الوجود إنسان
يجوز اغلط وأنساكي
تلاقي الجرح جاي مني
أنا اللي نشأت في حشاكي
وانا اللي كتير ببكيكي
ولا تأثَّرْت بِبُكاكي
أنا البذرة اللي جامعاها
كفوف صبرِك
وانا المزروع بمعانيكي
وانا المروي بحنان قلبك
ومتشال حلم فـ عنيكي
وانا برضه اللي وقت الجَنْي
طرحت الطرح مش ليكي
وطرحي كان في أرض الغير
وما طرحشي فـ أراضيكي
تناديني سنين فاتت
تخبط فوق ببان القلب
دعيتي كتير بدمعاتك
عشان اكبر وقولتي يا رب
تصون ابني واشوفه كبيييير
ويرعاني
يكون سندي في وقت الضعف
يكون فرحي في أحزاني
والاقيه وقت ما احتاجُه
وهو كمان هيلقاني
هاشيله في حشا روحي
يسيب همه في أحضاني
واديني كبرت ونسيتك
وزعلتك وبكيتك
صنعت بإيدي أحزانك
لقتني بتوه في أحزاني
بناديكي بدمعاتي
يا رب تكوني سمعاني
أنا خايف أعيش وحدي
أدوب فـ جراحي وأعاني
واموت ويدفنوني الناس
تقوم الأرض لفظاني
تقول لي هجرت حضن امَّك
وانا رفضاك في أحضاني
فـ أرجوكي تسامحيني
وقولي انك مسامحاني
