سهرة ريفية
********
في عز الليل و في القمرة
و لما الكل
يتعشى
بنخرج صحبة نتمشى
نعيد الضحكة و الذكرى
و نمشي بعيد عن الدوشة
و ع الترعة
نشوف الأرض سجادة
من الخضرة
عليها نخيل
قايم راكع
يوحد مبدع القدرة
نشوف التمر عليها عقود
سبح حمرة سبح صفرة
نخيلنا يبوح بأسراره
و يكرم كل من زاره
و لما نمر بجواره
ما يحرمناش من هزاره
و يضرب روسنا بالتمرة
نشوفها دوغري نتسابق
و من صالها
يلاقي عيونا باصة لها
و يقسمها
ما أصل اللذة في القسمة
و في اللمة
و نتمرجح مع النسمة
و نرسم ع الوجوه
و بنواصل
و لما نسير
نلاقي الزير
بميه زلال
بنروي الشفة
و الفشة
تعوم من الضحك
على نكتة
و أحيانا تكون بايخة
بتحجل كالفراخ دايخة
بنضحك ايوه و نجامله
و لما يحس بواختها
يداري بنفسه لبختها
يقول الدنيا طبختها
حقيقي و كل شئ وارد
ما أصل الشلة كوكتيلها
فيها الساقع فيها البارد
بينظر للقمر سارح
و عقله في الغرام شارد
ولما صاحبنا يتكعبل
نقول له بضحك
قوم يا أهبل
و يتنرفز
و لما نصالحة يتعزز
و نترجاه بلاش تزعل
يا بختك هي مين ديه
صحيح خدودها وردية ؟
دي حتى تخينة و غبية
أكيد كالوزّة محشية
و كيف الشوق
واخد عقلك
و نسمع صوت يقول عفريت
بعين واحدة
و حمرة و نار
تطق شرار
تسيب من الرعب مفاصلنا
و نجري ما حد حصلنا
نقول ايه صح ما فيش عفاريت
نعود من تاني نتجمع
و نتشجع
و يعلى الصوت خلاص نرجع
و بنهلل و بنكبر و نسترجع
بخطوة و خطوة قربنا
وايدنا بتسند ركبنا
نشوف كومة من البشاريد
و وسطيها زجاج مكسور
بيعكس ضواء
و فوقها جريد
تعود الضحكة من تاني
و نتذكر قصص عبلة مع عنتر
نقول لصاحبنا قوم عبر
و اكتب ع الحنان و اشعر
و قول لنا ايه كتبته جديد
و بعد رجانا و الترديد
بيخرج من جيبه الدفتر
يقول صلوا على المختار
بديع أنوار
هداه أزهر
رسول من الله
و ربي عطاه
كرم اكتر
و باصواتنا نقول الله
عليك الله
و قول كرر
و نرجع تاني نتذكر
في عز الليل و في القمرة
و لما الكل
يتعشى
