محروس و جمانة
في رمضان
الحلقة الأولى ..
محروس طبعك صــــعيدي
مش حمل دلــــع السواحل
دي جمانة ف النص عيدي
في هواها للـــرأس واحل
***
يا جمانة و الرقة طبــــعك
لصعيدي ايش كان رماكي
دا الورد خاتمك و طـابعك
مجنونة و لا أيه عمــاكي
*************
محروس و جمانة
في رمضان
الحلقة الثانية
محروس
فرشت لك جدار قلبي
و قلت لك عليه دوسي
و أحلف لك أنا بربي
قسم مسلم ما هندوسي
جمانة
من الحلفان دي ما بكلشي
بربك رد لي فلوسي
بايع دهبي ما خليت شي
و تبلع حتى مال لوسي
**************
محروس و جمانة
في رمضان
الحلقة الثالثة
جمانة
تقب و تغطس دوغري تجيبلي
جــــمبري جامبو و كيلو بانيه
او مـــن جيبك طلــــع سيب لي
حــــــبة فكــــة أو ألــــف جنيه
محروس
جمبري دا في الحلم يا قلبي
نامي بطهارة هتحلمي بيه
ألف جنيه آه يا انا يا غلبي
أنزل اقول هات حسنة يا بيه
**************
محروس و جمانة
في رمضان
الحلقة الرابعة
ـــــــــــــــــــــ
محروس
رمضان و رياحه هلت
ناوليني طبق القطايف
دي البطن م المش ملت
بفرولة بلي الشفايف
و لا عدت للأكل شايف
جمانة
و قطايف ايه اللي عايزها
هو أنت أعمى ما شايف
دا النفس تعلن عجزها
و السعر في الحلق واقف
**************
محروس و جمانة
في رمضان
الحلقة الخامسة
جمانة
محروس جاي عيد جوازنا
ماتجيبلي شقة ف ميامي
و الفـــــقر امتى يجاوزنا
و نربي قطــــة سيـــامي
محروس
ما تفوقي مش لاقي موزنا
طب فزي قومي من أمامي
دا الفقر مكتوب بيه فزنا
وباين له واقع ف غرامي
***** ********
محروس و جمانة
في رمضان
الحلقة السادسة
*****
يا جمانة صعب الجواز
دا القلب على الغلب طاوي
لو شرع بالــــضرب جاز
لضربت راســك بمطاوي
جمانة
محروس ما تلزم حـــدودك
و بلاش دا طبع الصعيدي
لي أهل تخــــــلع جــدودك
لـــو صــبت بالــشر أيدي
*************
الحلقة السابعة
*****
جمانة
محروس في حبك فسحني
طلعـــني من ريحة الشــقة
و فـــي بحر حبك طــوحني
محتــــاجة مــن قلــبك دقــة
محروس
يا جمـــانة فوقي بلا استعباط
و البيت مافيــــهشي غير الدقة
هو أنت تجري و هات يا عياط
عنـــد الأكل ما تقــــــــولي لا
***************
محروس و جمانة في رمضان
الحلقة الثامنة
جمانة
البحر بهزاره ضحك لي
و بموجته بلت لي هدومي
بالنسمة و البسمة دا حاك لي
من المتعة و نسيت لهمومي
محروس
شايفاني طرطور و انا جارك
اتلمي فـــوقي بلا مياصة
عيزاني امسك في شجارك
هو انت طبعك رقــاصة
*****************
محروس و جمانة
في رمضان
الحلقة العاشرة
*****
جمانة
محروس ما تقول فين اهلك
و لا حد مـــــنهم عزمنـــــا
مـــا في مرة بالخير ندهلك
و لا كرمه بالجود هزمنا
محروس
اسم الله على ورث ابوكي
خـــــــيره دا سمن وراكي
من يوم ما عندي سابوكي
قلة و كــــسرها وراكـــي
********************
محروس و جمانة
في رمضان
الحلقة (( 11 ))
جمانة
محروس نفسي في بلطي
سنجاري او حتى مقلي
لو لحم ضاني و ملطي
القلب راق لك و راق لي
محروس
يا ولية زاد فيك نصحي
ما تكني و بلاش الاطة
م الوهم فوقي و اصحي
م الهــم بعنــا البـــلاطة
***************
محروس و جمانة
في رمضان
الحلقة (( 12 ))
محروس
يا جمانة أعصابي ماسك
و العقل طار منك هارب
من الهم دا صعقني ماسك
و قفلت مثل الكهارب
جمانة
محروس خليني قافلة
و المخ ملهي ف شغلي
لا العقل يعمل لي قفله
دا القلب م الغيظ بيغلي
**************
محروس و جمانة
في رمضان
(( 13 ))
جمانة
محروس و الرب حارسك
يا سبب سعادتي و هنايا
الحب و الأصل غارسك
ليه تسيبني خليك معايا
****
محروس
يا جمانة روحي في كفك
و النور دا من فيض نهرك
في الروعة و لا حد كافك
لو عمري ما يكفي مهرك
**************
محروس و جمانة
في رمضان
(( 14 ))
محروس
يا جمانة رمشك وصابني
يا قطة و القلب فار فر
في هواك طرفك غصبني
و القلب مقتول و فرفر
جمانة ...
محروس كلامك بيسكر
يا نجم قلبي الرومانسي
بلسم في همسك و سكر
يا هناي ف سهري و أنسي
************
محروس و جمانة
في رمضان
(( 15 ))
جمانة
محروس روق و هدّي
و ارمي حمولك على الله
و هو طول ما يدك في يدي
بكرة دا أجمل و أحلى
***
محروس
أنت معيني و سندي
حبك يداوي جروحي
بوجودك الجنة عندي
يا روحي من جوه روحي
**************
محروس و جمانة
في رمضان
(( 16 ))
جمانة
محروس ما تديني وردة
ياسمينة او حتى فــــلة
محتاجة همس النهاردة
دا القلب فيه ماس وقفلة
محروس
يا جمانة م الوهم فوقي
ف البيت مافي حتى كسرة
و سيبيني دا البؤس فوقي
يا مصيبة شرسة و كاسرة
****************
محروس و جمانة
في رمضان
(( 17 ))
جمانة
محروسي دا الجو ولع
ارحمني عايزة مكيف
دا البيض من الحر طلع
كتاكيت و نازلة تصيف
محروس
يا جمانة مش فاضي ادلع
عقلك من الصوم دا خرف
و انا جيبي فاضي لو اخلع
م الصيني بطهارته انضف
****************
محروس و جمانة
في رمضان
(( 18 ))
جمانة
محروس يا لذيذ يا شوكليت
انا قلـــــــبي عنــك ما تاب
في الفهم عقلي دا بوكليت
و انا رمشي لاب توب و تاب
***
محروس
يا جمانة و عنيكي ترسم
للقلب حــــني و رقـــــي
لو مرة يسقط لي سيستم
اديهــــــا دوغري لورقي
********************
محروس و جمانة
في رمضان
(( 19 ))
محروس
في جمانة بكـــتب و بقره
انا عقلي ف عيونها سارح
و ف رأسها دا مـــــخ بقرة
يضحكوا عليه في المسارح
***
جمانة
محروس ما فيش ميه ساقعة
تلاجتك دي باظ ما تورها
في هواك من الحب واقعة
و البقرة بتحب تورها
****************
محروس و جمانة
في رمضان
(( 20 ))
جمانة
محروس العيـــــد و قرب
ما تقب شخــشخ لي جيبك
و طاوعني و اسال مجرب
لو رحت طـــــوكر لاجيبك
**
محروس
يا جمانة دا الجسم جرب
و الناس بعينهم صــابونا
لـو مــرة ع العقـــل جرب
ما يلاقوا فيه غير صابونة
