حكمة أب
كان ياما كان حدوتة زمان
إسمعي يافلانة إسمع يافلان
عن شاب سليل الجاه والمال
لما إتشقلب بيه الحال
ولما أبوه الغني يوم قال
دوام الحال ياضنايا محال
عمال تصرف هنا وهناك
على سهر الليل وصحاب السوء
صبح وليل يتمنوا رضاك
مادام دفيان تركب وتسوق
ولما التل فى يوم يختل
ويروح مالك ويزول جاهك
يبعد عنك كل اصحابك
يهرب منك حتى حبابك
شايبلك حبل فى سقف المخزن
لو يوم حبيت تشنق نفسك
تبقى نجحت وحليت لغزا
حل يعيد من تاني لك نفسك
مات الأب إفتقر الشاب 
بعد حياة العز إتذل
جاع واتمرمط ريقو ماتبل
قال الحل أنا أشنق نفسي 
وفعلا نط وقف ع الكرسي
ولف الحبل رقبته الحلوة 
وزق الكرسي السقف إنهار
ومطرة مال تعمل ميت كوم
ورسالة محفوظة لهذا اليوم
مكتوبة بخط أبوه بتقول
إبني الغالي إسمع دا القول
حبيت أديلك درس يفيدك 
بعده هتفتح كنزي بإيدك
علقت الحبل فى سقف ضعيف
مايقدر يوم يستحمل جسمك
وفلوسي كلها شيلتها جواه
ورث يعيد من تاني لك إسمك
إحفظ نعمة ربك يابني
بدل مابتهدم عمّر وابني
إمضاء أب وحب ضناه 
وإدالو درس ما يوم ينساه
بقلم طارق السيد