فوفة قبل الزواج
ياحبيبة قلبي يافوفّة
ياواكلة العقل وحفّة
أنا دايب دوب في هواكي
ياحبيبة قلبي ياخِفّة
إن قلت راح أوصف فيكي
في السحر المالي عنيكي
ولا الورد البلدي
إللي مورّد خديكي
ياحبيبة قلبي يافوفّة
إنتي المركب وأنا دفّة
على موج بحر الأحلام
بحر العسل إللي إتصفى
ياأم القد الميّاس
يامجننة كل الناس
إدلعي إمشي براحتك
دلعك ع العين والراس
ياحبيبة قلبي يافوفّة
في عز البرد أدفى
من نظرة عينك ليا
وتغمضي عينك أتطفى
يافوفّة ياكل ما ليا
يا نبع من الحنيّة
ياحبيبة قلبي ياروحي
ماتحني عليا شوية
ياحبيبة قلبي يافوفّة
إللي يحب ما يتخفى
أنا حاسس إني بحبك
ياحبيبتي وانا في اللفة
ياحبيبة قلبي تعالي
إنزلي م البرج العالي
يافوفّة تعبت خلاص
ريحي قلبي وبالي
بقلم طارق السيد
فوفّة بعد الزواج ههههههه
يافوفّة ياأكبر قفّة
عجيبة ولها ودنين
لو أعرف إنك قفّة
لابعد عنك بلدين
ليه تفتشي جيبي يافوفّة
دا أنا عيشتي معاكي بالدين
أصبحت زبون الرفّا
من بعد شياكتي سنين
بتدلدلي ليه الشِفّة
وبترفعي في الحاجبين
لو يوم أسأل بالصدفة
وديتي المصروف فين
لسانك زي المبرد
لا بيهدى ف يوم ولا يبرد
إلا اما يلف له لفّة
ف ودان كل السامعين
كفاية تقلتي الكفّة
يا بومة يا غراب البين
يارب تجيلك هفّة
تصبحي ويّا المجانين
بقلم طارق السيد