ايام وبتفوتنا علي ضهر السكك لليل
أجمل مافيكي ماعدش حتي جميل
الدنيا بتلمم كل اللي حبوها وتسحرهم
ينزل عن ضهرها في الليل
الصبح في غيرهم
وأنا اللي فاتني الدور وإتداست بالرجلين
شربت منها بحور م الظلم في المراجيل
وقرقشوا عضمي وگ أني مش منهم
ولا كنت يوم زيهم وابنها البكري
الكيل طفح وماعدش ليه سبيل
حبل العشم مشنقه فوت الوداد وإجري
دخلت في الشرنقة نفق الغلابه طويل
الشمس متسلطه علي اللي في اللسته
وإسمه كان مكتوب وجنب منه إشاره
بس الخيار أرزاق والطعم والسناره
وان كان علي الاشواق أعمارنا بالهجري
اكبر مافيكم انا فوق كتفي سنين وخريف
من صغري لا أهتم
بالوهم والتخاريف
طلع اللي فات ملحمه وحقيقية عايشنها
فإن كنت واد مرجله
سكت ضناك برغيف
الليل سكت وام العيال نامت وانا وحدي في الصاله
واخدها رايح جي والهم حصاله
حوشت منه كتير علي قد أحلامي
حتي العطش في الزير بيشتكي الحاله
النمل لسه مانمش فوق الجدار يسعى
داؤب وعنده دليل لا خانه ولا ضله
ليه الكسل والخوف والرزق في القصعة
حمل ويشل ماتخفش
ربك عليم بالحال
يمكن اكون مالحقش ويسكروا الإقفال
يمكن يكون للشتا في حكايتي فصل اخير
لم النجوم من السما ماهي رافضه تبقي دليل
والضلمه سيبها كده تستر فجور الليل
#فجور_الليل
#عادل_عوف
