آني ... وإني
آنى..وإنى
سائل سألني
سؤال فتنِّي
كان فيه براءة
وفيه جراءة
وفيه تجني لمَّا عاينِّى
وشاف صروفي
وشحوب حروفي
وساءه أني .. إني .. وإني
من صغر سني ومن صفاتي
عايش حياتي
نغم بياتي ...
مُغرم أغني .. !!!
أنا المُغني
حالف اتنّي
أحرت واتنّي
فى نظام فتنِّي
واغزل فى معزل على نول ومغزل
ولأنى أعزل
مابكونش أرزل
م اللي قتلني ..!!!
ويلف لوفي شباك كسوفي
يادنيا طوفي
عشان تشوفي
من فكر نوڤي ..
تفتل كفوفي حبلين تمني .. !!!
سائل سألني ...
أنا ليه بافكر وانصح وادبر
لغيري أ كتر
ولنَفسي ( اكبر ) ...!!!
برغم إني باعرف أجامل
وأقدر أجادل
وارصف جنادل تسقى العنادل
عبير محني اإيديه بفنى .. !!!
ما انا المُغني
عايش بحيلته
كل اللي حيلته
منقار وريش
يسهر يليِّل
للريح يميِّل
يتعب يقيِّل
على أي شيش
وبالسعادة ...
الروح يمنِّي .. !!!
عصفور قرارى
املاكه قش
ماحلمش عمره يعيشها ضارى
ماحلمش عمره يعيشها وحش
مع إن منه ...
نالت ضوارى
وف لحمه شبعت ...
الدنيا نهش
انياب ... مالهش .. !!!
لكني عايش فيها وكأني
كنت المسالم
ابوفكر حالم
خريج مكالم
وشايفها ورد ...!!!
حاولت اكالم
بالعقل عالم
حريف مظالم
وجدال وعِند
غمم عيوني
خيب ظنوني
وزاد جنوني
انه لحقيقتي بضلاله هَد .. !!!
حبيت بجد
أكدح واكافح واخدها جد
لكن لاقيتني
باجري مغمي ورايا همي
وف حارة سد .. !!!
الهم جابني
نصله اغتصبني
وف روحى مد
حاولت انادى
لالقيتنى قادر وﻻصوتى طالع
وﻻجنبي حد .. !!!
بصيت لروحي
لاقيت جروحي
بتواسي آنى ...
هذا لأنى
إنسان صحيح
كاتب وقاري
وكمان .. نصيح
قاعد فى داري
واخد قراري
لوضاع وقاري أ دن واصيح .. !!!
وان يوم ﻻموني
أو عيروني
أو كتبوا نعيي بدموع عيوني
واستصغروني
أقول لقلبي أصبر وخبي
ماتكونش سلبي
فى الماضي قبلي
عابوا المسيح .. !!!
القصد إني ...
بالكاد عايشها
سايب سباعها فرحان بريشها
رامى غُنايا
ف وشوش وحوشها
راسم آسايا ... تعابين تلوشها
وازاي هاحوشها ..!!؟؟
كلمة و نصيحة مني لصديق
إن شا الله قشه
تنقذ غريق
وأما نَفسي
فانا برضو نِفسي
أشوف فى ضلمة دنيتي
ومضة بريق .. !!!
تكشف ملامح سكتي
وتداوي آني
واشهد بأني
دايماً لنفسي ف وحدتي
بانصح واحاسب
واعرف حدود حريتي
وأقدر أحاسب
وأقدر أشاكس دنيتي
بفُتات مكاسب
باعمل مكاسب
لكن فى حسبة دنيتي
بالطبع ..
راااسب .. !!!
وأقدر ساعات أكتب آيات
وساعات ساعات
باعمل حاجات
بتسئ لسني .. !!!
سائل سألني
سؤال عجبني
مليان إثارة
واستنارة
من واد إدارة
ف أساس عمارة
بحروف بيبني
وبيلاعبني .. !!!
بيقول دا عجز
إلهامه أجز
وانا باش مهندز
وسعيد بأنى
مسنود وقادر
أبدأ وابادر وافتح منادر
وفيها احاضر
دروس في فني
أنا قلت ... حااااضر
أنا هو ... وحاضر
مخلوق مناقر
واموت ... واداقر
واقفش واغني
وان جوع قرصنىي
الحس مسني .. !!!
سائل سألني
وانا له هالبي
وافتح له قلبي
وعليه هاجيب
بعد اما اجيب
م البدر بدره
ومداد نجيب
واكتب له بيه
عن حبى فيه
كلام يفيه
ويليق عليه ويفَهِّمهُ
انه فى كآبه دنيتي
بسمة حبيب
وان الفؤاد أول ماشافه
حكم بأنه
خلاف ..خلافه
وحس إنه بيملكه ويميل إليه
وحس إنه
بدون مايقصد ولا يحاول مهتم بيه
من ثقته فيه
قالى خاويه
واياك بكلمة معرفة
تبخل عليه
وبكره .. بكره
هيرغمك تتباهى بيه
هقوله ايه
قلب وحكم
والعقل طاوعه وصدقه
وطلع بأنه
كان غاويه
من اهل بيتي
معدود لاقيته
بقى باقيتي
قراني هو
وصمني وانا ..
أنا حكيته
صبح لساني
فكرة قصيدى
هو الشذى
ميزة الورود
هو الندى
يغسل وجود
إنسان ودود
وهو لما يقول عمل
يثبت وجود
مالهاش حدود
أمالي فيه
إيماني بيه
وثقتي إن بيوجعه
ع البعد آآآنى ...!!!
بقلمى ابوهاشم السقا
