الحب ياابنى وطن .. والوطن مفقود ......... !
الحب توت وبيوت وسكوته مش مقصود .
مش يوم لكل الناس .. ولا نخوة معدومة ..
ولا زكريات وخلاص .. ودندنات على عود .
******
إرفع حجارة فوق حجارة وإخلق لنفسك صنم ..
واكتب تاريخ وإعْمِلُه عيد والعيشه عيشة غنم !
تقدر تقول الحب زرعَة بلون خَضَاَرَكْ ..
تطرح لكل الناس و متستناش ردود .
.. عارف زمان ..
كنا بندفى الليالى بالكلام .
وأحلى ضحكة .. مش أى ضحكة والسلام .
بعد السلام ......
إبتسامتك من كلامى .. غصب عنك ..!
قلبى حاسس إنى ظالمك ..
بس عقلى شاب ف حُبَك ..
غصب عنى كبرت يابنى أَلْف عام .!
******
عارفك بتزعل م النصيحة وم الكلام
بس مش عايز تقولى .. بُكره تِكْمَل الحكاَوى ...
مكسوف تقولى .. عايز انام .
صعب عندى تكون مُغَيَب
ولاَّ مش فاهم كتاب العربى مثلآ .. يُقصد إيه ..!
لما أقولك إنى طول العُمر بحلم أشوف طريقى
أبقى شااعر أبقى كااتب ولّاَ صاحب حق عايش ..
أيوه عايش .. مش طور بيجرى جوه ساقية ..
ولما ييجى الدور عليه ..
بيركنوه !
لا هو شاف الدنيا بعد ماغمموه !
ولا هو يعرف غير يدَوَرْ ع الدواير !
أو يطاطى ف كيس قماش يملىَ بطنُه بأى حاجة
ويهز ديلُه .. إنه عايش .. لسه عايش !
أيوه عايش والسلام .
لما أقولك إنى طول العمر بعشق كل حاجه ...
وأى حاجة فيها خطوة .. كنت برقص .
كنت برسم أهرامات ..
حتى ورقى كنت بعمل منه مركب
بس مش علشان أهاجر .. أو أغيب !
كنت برسم طيارات ونخلة طاله ف وسط لوحة
ونُص دايرة بتضوى أيامى ابتسام .
كل حاجة قريتها كدبة وكل حاجة فيها شك
مَرَّه أرسم ف الخريطة إنى مصرى
ومَرَّه أنادى بأعلى صوتى مش بتاعتى
إللى عايز حته يدفع ..
( طب بكام !؟ )
******
واما جيت إنت اتبسطت ..قعدت أَغنى.. أيوه أغنى
قُلت اعوض إللى فات .
أنا مش بقولك تبقى زيى ..
دانت لازم تبقى أحسن ..
إقسى حبة ..
مش حرام .
............
#يااااحبيبى
بُكره تكبر جوه حضنى
بس أرجوك .. غصب عنى ..
إوعى تكره بعد حُبَك لما تكبر ..
إوعى تكره بعد حُبك .. لما تكبر ..
( يلا نام .)
#######
