التنزه بالكلب و التمارين الرياضيه المختلفة

في الجزء العاشر يا شبابا هتكلم عن أكتر حاجة بتسعد الكلاب وهي التنزه و التمارين الرياضيه. وقبل ما ندخل في الموضوع عايز أوضح حاجة مهمة جدا وهي الفرق بين التنزه و الرياضة.

في ناس كتير أوي متخيلة أن الرياضة للكلب هي مجرد تمشيه نص ساعة في اليوم وخلاص، وناس تانيه فاهمة الرياضه على انها حاجة زي تمارين كمال الأجسام كده كلها عنف وجدية. لكن الواقع مختلف عن كده بكتير. والكلام في الموضوع ده هيكون مخصص للكلاب اللي عايشه في شقق، يعني مش بيت بحديقة مثلا أو فوق سطح لأن الوضع بالنسبه ليهم هيكون مختلف.

الكلاب حيوانات نشيطة بطبعها وربنا خلقها وهيأ جسمها للنشاط ده، والعيشة في شقق بتأذي الكلب نفسيا قبل ما تأذيه صحيا. وممارسة التمارين الرياضية والتنزه بتقلل من الضغط النفسي عند الكلب، وكمان بتبدد اي نشاط زايد ممكن يكون مدمر في البيت، لان الكلب لما بيزهق بيبتدي يطلع نشاطه الزايد في شكل عنف في التعامل أو شراسه أو اعمال تخريبيه في المنزل زي تقطيع الفراش أو الأثاث أو عض الأشياء الخشبية، وفي حالات متقدمه بتوصل لتبول أو تبرز متعمد في أماكن خاطئه. علشان كده الكلب محتاج نوعين من الترويح عن نفسه:

1- التنزه

التنزه مقصود بيه المشي مع الكلب بسرعة الانسان العادي، وغالبا بيكون الكلب مربوط بالليش علشان ميجريش بعيد أو يأذي حد أو تحصل له حاجة. والتنزه مهم جدا للكلب لأنه بيرفع من معنوياته وبيساعد على تحريكه لكل عضلات جسمه وبيزود من طاقة الرئتين وبينشط الدورة الدموية، وكمان بيساعد الكلب على التعرف على المجتمع وبينمي حواسه المختلفه، من ادراك و شم وتقدير الابعاد و المسافات، وأهم حاجة انه بيزود من ارتباطه بصاحبه.

وبما ان التنزه مهم للكلب بالصورة دي فلازم الكلب يوميا يخرج على الاقل نص ساعة في نزهة، ويفضل تكون النزهة في مكان هادي خصوصا في شهور عمره الأولى علشان الكلب ميخافش من المجتمع ويتعود عليه تدريجيا. وطبعا لازم مع التنزه نبدأ تدريبات الطاعة المختلفة الخاصة بالتنزه زي المشي بالليش و طاعة الأوامر خارج مكان المعيشة و خلافه.

ويفضل في اوقات التنزه يكون الكلب مع صاحبه بس، وميكونش معاهم حد تاني، يعني مثلا مش تروح تقابل واحد صاحبك كل يوم وانت بتنزه كلبك لأنه كده هيحس انك بتخرج مش علشان تسعده انما بتاخده معاك وخلاص وده هيضعف الروابط بينكم. انما ممكن تخرج مثلا بيه وانت رايج تشتري اي طلب، كده الكلب حيفهم انك عايزه معاك حتى وانت بتجيب حاجة، ويفضل انك تاخد معاك اي حاجة هو بيحبها وتديها له بعد ما تشتري طلبك علشان يحس انه عمل حاجة كويسه لما خرج معاك في طلبك. وبعد ما الكلب يتم سنه ونص، ممكن النزهة تكون مع اصحابك او اي حاجة، لانك هتكون بنيت شخصية الكلب خلاص ومعادش في اي مشاكل بالنسبه له انك تخرج تقابل حد وهو معاك، لانه حيفهم انك بتحب يكون معاك حتى وانت بتعمل حاجة تخصك انت.

2- التمارين الرياضية

المقصود بالتمارين الرياضية هي ممارسة تدريبات معينة لتحسين صحة الكلب والارتقاء بمستواه البدني، والتمارين دي لازم تكون بنظام معين، وجدول تدريبات مظبوط، وأهم التمارين الواجب اتباعها مع كل الكلاب هي:

أ- المشي الحر: المشي الحر هو انك تاخد كلبك لمكان هادي ومفيهوش اي عربيات أو اي حد ممكن يضايقه وتسيبه يجري ويلعب او يمشي جنبك بدون ما يكون مربوط. والمشي الحر مهم جدا جدا لتحسين سلوك الكلب والارتقاء بحالته النفسيه، ويفضل يكون المشي الحر 3 مرات في الأسبوع لمده ساعة في كل مره.

وياريت اننا نلعب مع الكلب في فترة المشي الحر ألعاب زي الجري أو retrieve لأن الالعاب دي بتنمي قدرات الكلب بصورة كبيره وبتبني شخصيته بسرعة كبيرة. والمشي الحر يفضل يكون في مكان فيه نجيل، يعني مش على الاسفلت علشان يكون مناسب لأقدام الكلب (المخدات).

ب- الركض: الكلب من سن 8 شهور محتاج أنه يركض ركض متواصل لمدة نصف ساعة مرتين في الأسبوع وده لتنشيط الدورة الدموية و الرئتين وتحسين قدرة العضلات عامة، وكمان الركض بيساعد بصورة كبيرة على بناء جسم الكلب بشكل سليم ومتناسق.

والركض أسهل حاجة ليه انك تركض بجانب كلبك، طبعا مش ركض سباق انما ركض رياضي عادي، أو انك تخلي الكلب يجري جنبك وانت راكب دراجة مثلا مع مراعاة ان سرعتك تكون مناسبة للكلب.

جـ - القفز: كل كلب محتاج انه يدرب على القفز، وتمارين القفز مهمة للكلب من سن 6 شهور علشان عضلات الفخذين و الظهر. وتمارين القفز هتكون مره واحده اسبوعيا ونبدأ بارتفاع بسيط يعني ممكن 30 سم كويس أوي وكل مره نزود الارتفاع.

دي كانت التمارين العامة لكل الكلاب، لكن هنلاقي كلاب تانيه زي البيت بول و الرودفايلر و الدوبرمان مثلا محتاجه تمارين تانيه بالاضافه للتمارين دي، وانا مش هناقش التمارين دي لأن كل كلب له نظام معين بيتناغم مع بنيته الجسدية. وان شاء الله في موضوع هعمله قريب خاص بالتمارين الرياضية للبيت بول و الدوبرمان.