جَاتْ الدِّرَاسَة
========
جَاتْ الدِّرَاسَة....وْمْشَى وَقْتْ المِحْوَاسَة

خْذَاوْ الْبْلَاصَة....طباشير ولوحة و طلاّسة

لِجْيُوبِي كَنَّاسَة ......مِهْمَا حَطِّيتْ عَسَّاسَة

وَقْتْ الكُرَّاسَة .... فِيهْ أَنْفَاسِي حَبَّاسَة

كُثْرُتْ الْكْتُبْ.....الْمْحَافِظْ وْلَاّتْ نْصُبْ

شَيْ يِعْجِبْ.....تفضّل إفْرِزْ كان تْحِبْ

هذا أدب ْ ..... يا مْتَبَّعْ شعري تِكْسِبْ

لا تِتَّغْلَبْ ..... كلامي فصيح ومرتّبْ

خْطَابِي لَاهِبْ... يَقْرَاهْ صْغِيرْ وْشَايِبْ

فِي عِلْمْ الطِّبْ.... عُومْ بَحْرِكْ يَاطَالِبْ

تْشُوفْ الْعْجَبْ....فِي سُوقْ تَوَّة تِنْصَبْ

سُومُو يِلْهِبْ ..... نعجة عُشْرَى عِنْدْ جْلَبْ

قلبي تِرْعِبْ..... بَحْرُو غارق مُوجُو غْلِبْ

في ركن اللّغات...عناوين كثيرة بالمِيَّاتْ

نسمع في بْنَاتْ...يْقُولُوا هَذَا عَامْ الشِّيخَاتْ

قَرَّبْتْ وْذِينَاتْ ...... لْقِيتْ الحِسْبَة آلُوفَاتْ

بَاعْ السَّعْيَاتْ...... بَابَا وْكَمِّلْ البَقْرَاتْ

في الإعلاميّة ..... بْحَرْ تْحَلَّتْ فِيهْ ثْنِيَّة

مَاهِيشِ دُونِيَّة..... هِيَ لَازِمْهَا صَارْمِيَّة

مَدِّيتْ الشَّهْرِيَّة... فِي بَالِي تْرَجَّعْلِي بْقِيَّة

حَلِّيتْ يْدَيَّ ..... مَالْقَيتْ كَانْ أَلْفْ وْ مِيَّة

مَازَالْ البَاقِي..... وْخَيَّانِي حْفَاتْ سَاقِي

نْلَاجِي وِنْقَاقِي.... المُرَتِّبْ مَاعَادِشْ وَاقِي

كْثُرْ إِنْفَاقِي ........ لِلرِّيحْ حَلِّيتْ أَشْدَاقِي

مِنْ كَثْرِتْ أَوْرَاقِي... نْدِمْتْ عْلَى يُومِكْ يَا صْدَاقِي

*عبدالستار زرّوقي

القيروان

تونس