قالولي ثورة ياسمين
===========
كثرت قدّامي البيبان
ماعرفت الخروج منين
لاتوضّح طريقي لا بان
منّا يسار و منّا يمين
ريت ثنيّة محلاها
فيها زهور ورياحين
نجوم تضوي في سماها
هلال مرصّع ع الجبين
سألت عليها أولاد الحومة
قالولي ثورة ياسمين
لكن هي مرحومة
وأدوها وهي جنين
يادوب عمرها دام نهار
ينقص منّو ساعتين
شافت فيه اللّي صار
قتلوها وصاروا سلاطين
حلّوا فيها أبواب كثيرة
والباب يهزّ لبابين
حتّى من باب دزيرة
يعدّي طول للقصرين
باب يهز للتّأشيرة
وباب فتح ع المحرومين
أحزاب كبيرة وصغيرة
عليها الكل ملمومين
قالوا الثّورة ثورتنا
واحنا ليها لبّاسين
قاموا بيها عمومتنا
قضوا على عهدك يازين
تلمّت عليها الفصّالة
صار الكل خيّاطين
هذا يخيّط دربالة
لاخر حضّر قميصين
ولّي فصّل سراول
يحب عليهم محزوقين
واحد يصنع في معاول
يحب يكون مِ الهدّامين
وانا قاعد نتفرّج
حاطّ يديّ على الخدّين
سألت عَ الباب اللّي يخرّج
قالولي ثلاثة وعشرين
نوصل للباب المطلوب
إن شاء الله نكون من النّاخبين
وعدويا يولّي محبوب
لقلبك ياتونس الحنين
**عبدالسّتّار زرّوقي
القيروان
تونس
ساحة النقاش