يا زمالي

أ يا زمالي عايقني الغرام جننني

تايه دربي في الزول البريدو هجرني

أيا رب الغرام إحترت فاير جني

ادعوك سوقه لي أم سوقني ليه وصلني؟

*|*|*

النادي الرطيب من ريده ما بتخلا
يحلالي معاه كل المرار يتحلا
الخلاهه مِن سقف الجمال إنسلا
يسقني الحنين مِن ريدي ما يندلا

*|*|*

المافي السمح معدوم مِتِل تهذيبه

يحرق في القليب بعدو ويقيدو لهيبه

طلاسم سحره مجنونة وصعب تعريبه

نجاض القلوب هاري الكبد تعذيبه

*|*|*

وسادر في غرامو المن كماله إتعلى

وما بخشى العتاب إن بالعذاب أتعلى

رويحتي فداه إن يعصر قليبي ويقلى

اصلو الشافو ما بحمل فراقو إن ولى

*|*|*

يا خلي الرطيب والله ما بتمله
لا بتقدر تفارق حِن جناينه و ظله
أنا الخلاني محتار في يـباسي وطله
يعصر في القليب وتكب دموعي تبله

*|*|*

يا زمال بروح لا بد أباري ضليله

وأشرب قوهة مِن يد الوريف تظليله

أنا الخلاني بيناتكم شقاني عسيله

براق العيون يضوي و يزيد في سيله

*|*|*

يازمال حماني النوم ضياء قنديله

إن عشت الدهور ما بشوقني أصله بديله

فريع السيسبان أنعم بخده وشيله

خلوني النفوت أورد صفاهه و نيله

*|*|*

يا زمال عجيب والله قدله و ميله

نهاره وريف ظلال ضاوي ومنور ليله

أنا الخلاني بيناتكم مُطفِّرَا خيله

عشطان داير أموت إن ما نشقت عليله

*|*|*

يا زمال يمين عاقد أناسبه جليله

مِن عز الرجال أصلي وتقيل في كيله

أنا الخلاني راجيكم تنمو مهيله

دايركم معاي نمشي و أعقْدُه حَلِيلُه