قصيدة زهر الحظ
==========
يا زهر دايما تلاعبنى والحظ دايما معاندنى
فى الطاولة تزنقنى فى اليك واخسر بسرعة وبدون شك
وفى الدومنة تقفلنى على طول وحياتى تفضل كشرى وفول
والعب فى سلم مع تعبان وانزل بسرعة مع التوهان
وأقول اجرب بنك الحظ أبيع واخسر كل الحظ
امتى يازهر راح تعملها واصحى وألقى حياة غيرها
والبلية تلعب بقى يا جميل وفلوس تغرق وادى النيل
وأكل فى بيتزا وكنتاكى ونجمى ده يلمع فى سماكى
وأجيب فى شقة وعربية وابطل أكل طعمية
واطلع أصيف كده فى بلطيم واعوم فى بحر كبير وعظيم
والبس فى بدلة على مقاسى ويقولوا عنى دبلوماسي
وترضى ده عنى هنومة ونعمل فرحنا فى بلكونة
وابقى فاسد كده وسعيد وأجيب فى لحمة ولبس جديد
ويرشحونى فى برلمان وأكل مخلل فى برطمان
واشرب فى شيشة وسجاير وسيجار فى أيدى وانا ساير
وأكل فى كبده كده دليفرى والناس تخبط وتجيب لى
لكن يا زهر اكيد خايف الصحة والبركة تفارق
ولا يبقى عندى يعنى إيمان ورضا وقناعة من الرحمن
لا لا بلاش انا مش عايز دى الصحة والبركة جوايز
لقمة بدقة وانا مبسوط احسن مااكلها باى قيود
بصحة ممكن اهضمها وبدونها اعيا واسيبها
ياما لقينا مليونيرات مرضى وحزانا على اللى فات
ربك بيرزق كده فى علاه وبنحمده ونتمنى رضاه

مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون