الشاعر محمد البلاط

عايز تحبسنى احبسنى
......................
بتبنى ليه فى الساحل
وارض الحكر موجوده
ومتحدد لها كردون
من الترعه لحدى التوته
ليه بتناكف يا فرجانى
وبتعلى البنى تانى
واشيعلك غفير واتنين
تتوههم بحدوته
................
يا عمده الحكر للباشا
ووراه شله هباشه
عايز فى المتر الف جنيه
وعايزين شيشه وماشه
واجيبله ولادى تخدم فيه
وفرس الباشا انا اربيه
كأنى واخدها بقشاشه
وارض خالى فى الساحل
حاولت معاه وبداحل
اخد قيراطين لولادى
ووافق ورضى الاخر
وبيت العيله تحت ايدك
يبارك الله ويزيدك
ايجاره صعب علينا
منين هنجيب ونعطيلك
................
ده شغل نق ومعانده
وطالع لامك البارده
فى وشى جاى تحسدنى
وتبنى عافيه ومعانده
......................
يا عمده انا مغالطش
وعن الحاصل ما ذودتش
ليه الزناتى ومرسى
وشيخ العزبه بيلطش
كلامى معاك حافظ حده
لا بغلط ولا بطرطش
......................
وفى الباشا مغالطتش؟؟؟؟؟
وعكيت ياما وتطرطش
ووصفته راجل طماع
وقولت شله هباشه
بتوع تحشيش وماشه
وذاد وغطى فوق الحد
مصوتش بصوت لحد
كأن العزبه ملك ابوك
ومش عاجبك فينا واحد
من اليوم تتربط بمرد
وعلى المركذ يا ذناتى
ووصى الباشا المأمور
بفرجانى ده مش عادى
معارض دوله وسلطه
قبضنا عليه متلبس
بفاس فى الدوار بيهد
وخلى لسانك الفالت
يفيدك وابقى سوق فى العند
........................
ومن امتى اتحسب لى صوت
وفكرتوا ان لينا وجود
ما طول العمر بنسقف
ونبهلل ولو بنموت
وكل الشغل فى ايديكم
وسجلتوا اللى مات موجود
وفصلتوها بمقاسكم
وعايز الناس تبوس ايدكم
وتسند ابنك المسنود
عايز تحبسنى احبسنى
واهى ايام علينا بتفوت
وكل اللى مشى على غيش
ما بتدوملوش ويوم هيموت
ومهما ذاد جبروته
لابد فى يوم ياكله الدود

بقلم محمد البلاط