( الوصـــية ) بقلم/ علاء زايد
*******************

ماتت حبيبة القلب ياأمه
وسابتنى ملطشه للسنين
أخدت معاها عمرى ياأمه
وفاتتنى ميت بين عايشين
أخدت معاها الحب ياأمه
أخدت معاها أحلى سنين
تاه عقلى منى وتهت لما
غابت عنيها الطيبين
ودرت أخبط ع الخلايق
وأقول لهم راحت لمين؟
مات السؤال ده على لسانى
ماحد قالى هيه فين
وفاتونى تايه فى الليالى
أسأل نجومها السهرانين
أسأل عليها فى الحوارى
فى كل ركن فى كل بيت
الخلق عنى كانت تدارى
وتقول ياريتنا نعرف ياريت
وبعد ماتعبنى سؤالى
عرفت هيه تبقى فين
انشق قلبى منى ياأمه
انشق منى حتتين
صرخت ميت صرخه ياأمه
وقلت آآه ياأمه الحقينى
ياأمه آآه..
ماتت حبيبة القلب ياأمه
وماتوا كل الطيبين
ماعدش فيه فى الدنيا إلا
ليالى سوده وشياطين
ادفنينى معاها ياأمه
ادفنينى مع العنين الطيبين
دى وصيتى وبأقولها ليكى
ادفنينى مع العنين الطيبين
ادفنينى مع العنين الطيبين. (فى رثاء الأخت)