ذكريات الماضى
شاعر الغلابه
ايمن البلاط
هى فكره وجت فى راسى
والسلام
قولت اجيب ورقه وقلم
واكتب قوام
خط القلم بين السطور
حكايات كتير
وذكريات عدة وفاتت
من سنيين
حكايات قليله فيها السعاده
وكتير كتير فيها عذاب اليم
اللى يجرح الفؤاد
واللى غطى وذاد
ان الجرح يجى م القريب
اوعى تعاتب ف يوم وتلوم
على حد وتقول مظلوم
وتنسى ان ربك موجود
هو ارحم الراحمين
السجاره مولعه
والذهن شارد
والدخان مالى المكان
والظلم فى قلوعه فارد
وقف القلم بين السطور
عمال يقلب فى اللى فات
ذكريات وراء ذكريات
منقوشه فى قلبى للممات
ذكريات من الطفوله
فى القلب والعقل مرسومه
ولعب الشارع والغيطان
واول رحله مع الصحاب
لعب وهزار
واول قلم كان العقاب
لما غلط فى الكبار
اول بنت عرفتها
واول ايد لمستها
ورسم القلوب
والشخبطه ع الحيطان
واول حب يمس القلب
مع بنت الجيران
واول بوسه كانت ع الهواء
من وقتها قلبى انكوى
وعرف معنى الغرام
ذكريات حب وشجن
وعذاب والام
وعودة الأب اللى غاب
فى الغربه بقاله سنين
وفراق حضن الأم اللى كان
مليان دفى وحنان
بقينا منه محرمين
وامل حياتى اللى خاب
فى الشوق والحنين
والحلم اللى ياما حلمته
وعاش معايا طول السنين
وصاحب عمرى اللى خان
لا عمل حساب لعشره ولا دين
خط الزمان عليا
ورسم خطوطه ع الجبين
لاشوفت يوم حنيه
ولا حد قالى انت مين
زى ماجيتها خارج منها
مهما طالت السنين
الوش كرمش والشعر شاب
والفرح اتبدل بحزن وانين
ذكريات لسه كتيييييير
مدفونه فى قلبى الحزين
لا عارف اسكت ولا ابوح
وعايش زى طير مدبوح
كلامى لو قولته هيجرح
والعزال فيا هتفرح
وابقا من ضمن المجنين
هى فكره وجت فى راسى
والسلام
قولت اجيب ورقه وقلم
واكتب قوام
شاعر الغلابه
ايمن البلاط