عاش اللي شافِك
ياما حملتِك عا إيديّ
و مشّيتِك شويِّ شويِّ
قسمت اللقمة و طعميتِك
و فِرحِت فيكي عينيّ
ونطرتِك تا صرتي كبيرِة
وتكوني أحلى صَبيّة
...
هلّق شايف حالي فيكي
كيف ما جيتي أو رحتي
ياما خِفت عليكي ياما
تا نجِحتي و تعلّمتي
...
هلَّق صرتي مثلي حُرّة
مسؤلِة عن أعمالِك
وِسع الدنيا جايي بكرة
تعيشي أحلى أيّامك
لكن باقي براسي فكرة
من بعدي تبقى ببالك
بدّي ياكي تضلّي قويّه
لمّا تكوني لحالِك
...
نحنا صرنا الماضي الرايح
و إنتي إلِك الفرح الجايي
بدّي إتمنّى عليكي
تكوني أميرة الحكاية
تعيشي بقلبِك محبّة
لكن ما تكوني طريّة
...
الدنيا فيها كّذابين
فيها بشعين و حلوين
فيها اللي بيحبوا الخير
و كثروا فيها المجرمين
تبقي انتبهي عا حالك
و يحميكي ربّ العالمين
...
بدعي تا يطول عمري
و إبقى فارس عا بابك
يزيدوا اللي بيقولوالي جدّو
لمّا يشوفوني اولادِك
وأشكر الله عالنعمة
يا بنتي عاش اللي شافك
...
عدنان خليفة
2016