(مجلة كل الخواطر) حبة ورق -----------بقلم الشاعر \وليد المصرى

حبة ورق !!
...
من امتى كان كل اللي بينا 
حبة ورق ...
وكلمتين في كام قصيدة 
تداري شوقنا اللي اتحرق
قصة هوانا ما تتحكيش 
ولا تنتهيش بدمعتين 
وقلب مكسور اتسرق
قصة هوانا مركب عفية 
فاردة شراعها 
ولا تعترفشي بالغرق
طول عمرنا 
في الحب فارس 
لا هربنا مرة ولا انحنينا 
فارس أصيل 
ناوي يكمل السبق
من امتى كان كل اللي بينا
حبة ورق ....
وذكرى حلوة نبكي عليها
لما نحس بالقلق
فاكرة يوم أول لقانا
شوفت ف عنيكي كلام كتير
وعهد بينا ماينقضوش
أي مخلوق اتخلق ...
من امتى كان كل اللي بينا
حبة ورق ....
...
وليد المصري ,,