وقت الغروب
عا وقت الغروب اتطلّعت صَوب البَحر
والشمس كانت عم تودِّعني
قلتلّها ياشمس الرايحة خَلف الصُوَر
وتاركة العتم حولي يحبسني
رحتي و وراكي مش جايي القمر
رحتي و تركتيني أنا و حزني
...
مشتاق لشي نظرة من الأحباب
من كلّ وحدة بيوم حبّتني
وَحدي انا والشمس ب لحظت الغياب
مدري انا تاركها او هيّي ال تاركِتني
و يا نسمِة الهوا ال كنتي ترافقينا
من هلّق و بالرايح ما تنطرينا
...
مقهور والشمس تودّعني بألوانها
مثل شي رسّام جنّ عالريشة
والسما والبحر لوحَة مخربشِه
وألوان ضايعة مثل هالعيشه
منركُض و منحبّ و منتعب
ووقت الحقيقة الحسابّ بلّوشِة
...
اللّه معِك يا شمس ..و يا أحباب
إبقوا اذكروني بيَوم شي مرّة
كلّ ما سمعتوا طرب من فنّان
و كل ما أكلتوا الصبح منقوشة
و كلّ ما شربتوا شي من فنجان
تذكّروني و تذكّروا قهوتي المُرّة
...
عدنان خليفة
2016