(الهرم ها نقول له عِشِّة )
برلمان العوزة رايح
فى اتجاه غير اتجاهنا
كنا حوِّلنا اعتمادُه
لاستماعنا
فضَها زى اللى قبلُه
وغاب فى دخان المكان
اللى بتموئِد جاتوه
اسألوه
إنه تاه وسط الزمان
لقمة حلوة
وكَنز فاير
الهرم ها نقول له عِشِّة
والبيبان مفتوحة شِنجِى
والمقشِّة
للى بيعرَّض قفاه
لما يطلع ويا وائل
أو حياة
احتسب من دون ما تحسب
انه قمقم
أو مغارة
شفطة منك
شفطة منى
شفطة من قعر السيجارة
كلُّه حلو
كله ماشى
اللى باغرَق ليه بيِحدِف
نفسُه بحر
الشطوط كانت أمامُه
والقناطر
والمقَر
ندِّى للأحلام مسارها
لما قامت من مطارها
وانتوا بتعضوا الانامل
ليه تسوقوا بدون فرامل
اى عتَبِة خطَّاناها
حتى لو رشُّوها جِن
الأجن
احنا طبِّلنا بحياتنا
بالشمال
واليمين حاملة الغزال
مغناطيس حاضر هايحصل
بس سيبوا المصل يوصل
صبركوا
والدمغة لازمة
وعرض حال
راح جمال
جه جمال
المهم بعد فاصل
حتى لو جاع العيال
ابقوا ما تسيبوش مكانكوا
اننا بنقول هايحصل
أو محال
عهدنا بنفُض هيصة
والحقيقة نمط فيها
زى أستك والمجال
ـــــــــــــــــــــ
عِشِّة : بيت الدجاج أو يبيوت العشوائيات
شِنجى : وكينجى وبرنجى : الخدمة أو اوقات الحراسة الليلية فى الجيش
هيصة :مايشبه الشجار
القناطر الخيرية فى مصر أو السدود
وائل : مذيع مصرى مشهور
البرلمان : مجلش الشعب والشورى
بتموئد : تصريف جديد بمعنى بيعد له الموائد للمنفعة
جمال : تحتمل جمال عبد الناصر أو جمال مبارك
المقشة : المكنسة
الاستك : مطاط بيحزم السراويل والملابس الداخلية
الشاعر وحيد راغب