قصيده الى من يهمه الأمر .................
شيل ده من دا ................................. عاميّة
**********************************
شيل ده من دا === يرتاح ده عن دا
حِكمه قالوها زمان === تخلّي التعبان يهدا
وتريّح البال ، وكمان === م يقولش : م فيش فايده
شيل ده من دا === يرتاح ده عن دا
**********
لما تلاقي الحُزن طافِح === والكُل ع العيشه كافح
والمسؤول مخبول مش ناصح === وحموله ع الغلابه زايده
شيل ده من دا === يرتاح ده عن دا
***********
شيل ، وم يهمَّكش ... === دا يضرّك م ينفعَكش
بلا نَكش .. بلا فَكش ... === ومين يصبر ع المُرْ ده ؟
شيل ده من دا === يرتاح ده عن دا
****************************
الناس بتِغلي ، وساكتين === م العِيشه اللّي زي الطِين
تقول له : إدفع يقول : منين ؟ === مَ الحِيطَه م بَقِتش سانده
شيل ده من دا === يرتاح ده عن دا
******************
مسؤول عُمره م جاع === وطَبعُه الرَدي بيّاع
بيتمَرمَغ ف أرض مَشاع === ونفسُه للفساد رايده
شيل ده من دا === يرتاح ده عن دا
******************
حكومه ، والطَبع جَبان === م تجَيش الّا ع الغلبان
والجَعان هُوّه الشبعان === طاب ليه بلاش مزايده
م تشيل ده من دا === يرتاح ده عن دا
*****************
ويقول لك : هَمّي الشباب === وهُوّه قافل كل باب
ومخَلّي العيشه هِباب === وعقول دايماً معانده
م تشيل ده من دا === يرتاح ده عن دا
*****************
وبدال ثورة .. ثورتين === وقال : ( انتو نور العين )
ودلوقتي مش شايفين === ولا قادرين يسِدّوا دِين دا
م تشيل ده من دا === يرتاح ده عن دا
*****************
صندوق نقد ، وصَندَقنا === و ف عيشَه مَرار غَرّقنا
نِحلف لُه عُمره م صَدّقنا === وفَضَحنا ، والأُمم شاهده
م تشيل ده من دا === يرتاح ده عن دا
******************
آه يا دَهَب ( السُكّري ) === وَدّاه فين المُفتَري ؟؟؟؟؟
دا باعُه ، ومين المشتري ؟ === ياجَبّارين الزَمن ده
م تشيل ده من دا === يرتاح ده عن دا
****************
هُوّه ليه عندنا استِحاله === وزير يقدّم استِقاله ؟
وخارب بيوت الشغّاله === وللشَر عامل معاهده
م تشيل ده من دا === يرتاح ده عن دا
*****************
مركِب ، وبَحّاره عواجيز === تفكيرهُم فَشَل ، ويغيظ
حُلُولهم فيها تَعجيز === ودايماً عايزين مساعده
م تشيل ده من دا === يرتاح ده عن دا
*****************
عُلمانا أبدعوا بَرّه === سيبتيهُم ليه ياحُرّه ؟
تكونيش عايزه ( ثوره ) ؟ === م كفايه بَقَى مناهدَه
وتشيل ده من دا === يرتاح ده عن دا
حِكمه قالوها زمان === تخلّي التعبان يهدا
وتريّح البال ، وكمان === م يقولش : ( م فيش فايده )
.........................................
الشاعر رفعت ابو العلا
في 24/8/2016م