أنا واقف على بابك
للشاعر : محمد ضباشه
أنا واقف على بابك
وجنبى من الغلابة كتير
بصوت مبحوح ياما نادى
ما رد عليا فيها كبير
وناس مرصوصة بشكاوى
ورقها داب من الحرمان
وعيون غرقانه في دموعها
وبتخبط فى كل مكان
وأنا تعبان .... وأنا بنادى
وأنا تعبان .... وأنا ساكت
وأنا تعبان ..............
وأنا بشكى .. وانا بحكى
وأنا واقف على بابك
وشايفه كل يوم مقفول
ودا معقول
وأنا يا ست الكل فى رحابك
أنا أستني أية تانى
وأنا ماشى مادد أيدى
أنا هستنى أية تانى
ودمى بيغلى فى وريدى
ولا بخاطرى
ولا بأيدى
ولا بكام كلمة بسمعها هتتغير
وأنا شايف قصادى كتير
وانا شايف كلام تضليل
وأنا حتى ومش شايف
بقيت شايف كلام بحروف
تاخدنى الكلمة على معنى
أموت من الخوف
وتبعدنى الكلمة عن معنى
أبات ملهوف
ليوم تفتحى بابك
لأحبابك
لناس على الرصيف قاعدين
عنيهم باصة على هدمة
على لقمة
على حقنة
على شغلة
على قرشين
يحسوا بانهم حاجة
ولو طائر بدون جناحين
أنا طربوش بزر أسمر
أنا عمه ماليها صوت
أنا سماعة ما بتسمع
أنا كلمة خنقها القوت
أنا شارع ومش شايف
أنا ترعة وعطشانة
أنا ساقية ما بتلفش
أنا وردة ودبلانة
أنا نجمة على كتفى
بريقها راح ومن بدرى
ودا قدرى
أموت يا حبيبتى فى ترابك
وارحل ...
وأنا واقف على بابك
...........
...........(صمت)
الناس واقفة بقالها سنين
ومهما تعملى فيهم
بيطبلوا كما المجانين
وما أخدوا اى شيء ليهم
وأكون ثاير فى وسط الناس
وفى الثورة راحوا الدراعين
راحوا الجنهين
راحوا الولدين
.......
......
......
وصوت منى خارج يسأل
هو أنت يا حبيبتى فين ؟
وفين بابك ؟
ومين واقف على بابك ؟
ومين جوا ومين برا ؟
ومين هاصوا ؟
ومين لاصوا ؟
ومين داسوا ؟
ومين ماتوا فى الزحمة ؟
بلا رحمة
وأنا واقف على بابك
صحيح أنسان ؟
ولا صورة منسوخة
ومرمية فى كل مكان
لها أسماء ما تعدش
لها بصمات من الأحزان
لها طربوش على كرسى
لها عكاز ومالو أمان