الدنيا أدوار ومشاهد
معروضه بسينما الازمان
من فينا قبل مايتشاهد
إتمنتج مفهوش أحزان
أغليتا بالابيض وأسود
ويابخت أللي يشوف ألوان
.
فيه واحد عايش دوبلير
بيدور دايما علي الخير
بيطبطب دايما ويحايل
ولامرة بيستني جمايل
غير يفرح بسعادة الغير
فيه واحد دوره الاحسان
مرسوم علي روحه بأتقان
من زيه بيصبح إنسان
.
وفيه واحد فيها بيمثل
بالطيب دايما يتمثل
متسهوك دايما متمسكن
والشر علي روحه أتفصل
تفتكره اطيب انسان
من كتر اجادة للدور
يتشبه بيه الشيطان
.
والعايش كل الادوار
دايما في حياته بيحتار
ولا مره بيحقق حلمه
ولايعرف لطريقه قرار
احيانا بيكون انسان
واحيانا بيكون تعبان
.
نهايتنا أسماء ومشاهد
ويابخت اللي في آخره إتشاهد
هينول الأوسكار في الجنه
بالخلد دايما يتهني
عاش عمره فيها بإيمان
بيؤدي دوره بأتقان
كان دوره عبد الرحمن
#امين_الصفتي