جارى التحميل
استخدم زر ESC أو رجوع للعودة
..........(قبل الأوان).........
كلام كتير عنك
خاين مالكش آمان
حتى اللي فيك منك
بيأكدوا التوهان
الكل شاف إنك
بحر بلا شطآن
وسألت قلبي عنك
كدب كلام لو بان
عرفك صغير سنك
حب وحنان وإيمان
خالف كتير ظنك
خيرك وبان نكران
قدمته من قلبك
لناس بلا وجدان
كل اللي عاش جنبك
وإعطتهم الإحسان
كانوا ينعموا بحبك
ويتجروا بيك إنسان
في السوق يباع عرضك
سوق النخاسة إتهان
تجار ومن دمك
في السوق باعوك عريان
حتى أخوك وأختك
جابوا للخيانة بيان
علشان تدوخ دوختك
تغرق وصعب تبان
تلعن في يوم بختك
ويموت فيك الإنسان
عديت على ساحتك
صلبوك على قضبان
تايه في مدبحتك
والدم للأذقان
كل اللي بان تحتك
ذل وهموم وهوان
بصين على راحتك
نصبين لك الأ كفان
يا قلبي مصلحتك
تبعد عن الغربان
عشش خفافيش واحتك
والبوم على الأبدان
إركب حصان صمتك
وراجع الأذهان
شوف مين يكون خيمتك
ومين عليه عصيان
وإوزن فعال عيلتك
وإكتب بقى الأوزان
ومين يجيب سيرتك
بالخير ومين سيان
ومين رسم صورتك
والرسم كان عريان
وكفايه من حيرتك
بعد اللي شفته وبان
مين حركه غيرتك
ومين عليك غيران
وكفايه من نومتك
وإصحى ولو تعبان
وإنسى بقى طيبتك
وإطلب من المنان
يكفيك شرور خيبتك
قبل الأوان بأوان
........(شعر).......
عبدالله السايح
