(مجلة كل الخواطر ) الشارع ----بقلم الشاعرالمتميز \رفعت ابو العلا

الشـــــارع ....!!!!
..............................
الشارع ....
م بَقاش ... مُطِيع ..
م بقاش ... ودِيع ..
مَبيتفاهِمْش
الشارع ....
شَب صايع ..
م بيشتَغَلش
بلطجي ..
عُصبَجي ..
مكتوب ف شهادة ميلاده ...
( شَقي )
لِعُمرُه بايع ،
وحَياته ( قلْش )
قلبه قاسي ..
مليان مآسي ..
م بِيهِمُّهُوش
م يعرفش رحمه ،
وحياته زحمه ..
( م تِأمَنلُهُوش )
بيشرب بانجو ،
ومعاه حشيش ..
يغازل جارته ..
( م بيختِشِيش ) !!
ولو قلت : عيب ..
حتروح مَتجِيش
الشارع ....
ضايع ....
مدّي ضَهرُه ..
لكلّ جامِع ..
يدّن أدان ..،
ومُش سامِع
سادِدْ وِدَان ،
ومُش جامع ..
وقافِل بيبان ،
ومُش دامِع
داير بيه الزمان
كأن لاضُهر ،
ولا عصر حآن ...!!
دايس ع الوِدْن ..
السِدَادَه
وأخر تفكيرُه ...
العِباده
الشارع ....
ياساده في سَفَر
وقلبه أصبح ..
زي الحَجَر
ومش عايز اقول :
( الشارع كَفَر ) ...!!
الشارع ....
قَفَل الطريق ..
مَ هِي هِيّه سايبه ..!!!
لفَرَح ( رُوءَه ) ،
وجنب الفرح ...
جنازه خَايبه ..
( للمُروءه )
وضَجِيج الفَرَح ..
في قلبي دَبَح
حتى الفرحه ..
بقت مسروقه !!!
الشارع ....
شب فارع ..
كاره .. مكروه .. منبوذ
قاعد في مترو ..
قدّامه عجوز ..
واقِف يعاني ..
كطفل رضيع
الشارع ليه ...
م بقاش مُطِيع ؟
مبقاش وَدِيع ؟
عامل نايم ..،
قُدّامُه عجوز ..
يا اخونّا قولوا لي :
دا ح يجوز ؟؟؟
ولو قوِّمتُه ..
تلاقي قِيامتُه
يهِز ف قامتُه ،
يبَرطَم يشتِم ،
زعلان بسلامتُه ،
ويضرَب بُوز
الشارع ....
شَبْ مقاوِح ..
تايه .. رايح ..
بينا لفين ؟
عايز قَعْده .. ،
وفيها معاهده ..
لشارع ضايع ،
حاله حزين
عايز صَحوه ،
ودرسين نَخوه ،
ونُصْح رزين
علشان يرجع ..
شارع ينفع ،
وطبعُه زِين
زي م جِه ..
( ف صَحيح الدّّين )
م تقوموا بَقَى ،
وتزيدوا اللّـــقا ...
(( يارجـــــال الدِّين )) ...
..............................................
الشاعر / رفعت ابو العلا