أمل تايه .... بقلم الشاعر\ أبو يوسف محمد

أمل تايه .... بقلم أبو يوسف محمد
أمل تايه
وليل غامق نهاره سواد
بدايته دموع وأخره حداد
وساقية تدور على حلمى
ولا تنسى
تقرا الفاتحة وتسمى
وأنا حلمى
أمل تايه
بعيد زى السما والقمرة
حروف خايفة تكون ذكرى
وحلم بسيط
شارى الفرحة بالتقسيط
أهات بتمر
وشاربة المر
وبترضى
وقلوب تبكى فى السجدة
وناس جاحدة
لا تعرف فرض
وحلم صغير بيحضن أرض
ويمد الخطاوى مد
وكل طريق بيمشيه
فى أخرة انسد
حالف دايما يكون عايش
رافض دايما يكون هامش
قلب بيعشق الترحال
بيحلم مرة يكون كلمة
فى الموال
ليالى طوال بيتمنى
يجرى يسابق القمرة
ويتهنى
وأنا واقف مع الأيام
وألف علامة إستفهام
هتدفع كام
وألف لجام
والف لجام يكممنى
رافض مرة يسمعنى
وكل ما أحاول بيمنعنى
ألف جدار
رافض عينى تشوف حلمى
وأى نهار
وباستمرار
أمل تايه
رافض مرة أكون حر
حالف دايما أدوق المر
سنين عمرى بتسبقنى
وعدى العمر