مجلة كل الخواطر:: عودينا :: " بقلم الشاعر المبدع أ / وحيد راغب

عودينا نقول سعادتك 
مش لحاجة أو لخوف 
علمينا ازاى نطوف 
والمناسك حتة منك 
ساكنة فينا 
والحجر الابيض عنينا 
شايفة نورك من زمان 
والأمان 
لما نبقى ف بطن حضنك 
كل متحرك وساكن 
يبقى لينا 
تشربينا الشمس كاس
والهوى ينسم علينا 
واللى عازل 
واللى باحفر الانتكاس 
راح يصيبه موت بغمة 
هو فاكر لما يعشق 
كسر سنة 
أو يدوس فوق المحبة 
بالمذمة 
يشت فينا كل لمة 
احنا زى الصبح فاتح 
همته وقت الشروق
مهما طال الليل هايكسر 
ضلمته 
من دون إهانة 
أو نشوق
احنا رعد ف إيده برق 
بين سحابة راح تمطر 
احنا وقت الصيحة 
عنتر 
يشترى الدنيا بحبه
لو يواجه ألف نوة أو رياح
أو يعضه ف نن عينه 
نعمان وجيشه 
والنجاح
مسافته تبعد 
زى موجة بتنكسر 
عند الشطوط
مين بيقدر ينفلت 
م الاخطبوط 
عودينا وامنحينا در بحرك
مهما غصنا نكون ف يدك 
تحت أمرك 
رفرفى وادينا شحنة 
من طيورك
احنا برده من صقورك
لمى فينا اشلاء ولادنا 
وارسمى لوحة وجودنا 
كل وقت وله أدان 
والغمامة فوق رؤسنا 
سودوها بالغيلان 
ايه مصير الكون بدم 
والفنا يطلع لسانه 
ويستجم 
هو احنا قشة قام خدتها 
الريح وطارت 
والآبار اللى فحتها جدنا 
وشربنا منها 
الوقت غارت 
عودينا نكون مسارح 
كل منا يكون له دور 
كل فصل وله غناه 
وكل قافلة مشتهاه 
كل داخلة وليها كورس 
أصل حورس 
كان إله 
لما غاب الوحدانية 
ولما حطوا فوق رؤسنا 
السلطانية 
كل غية وليها نية 
عودينا نهر واصل بين منابعه 
والمصب 
نحترم قطرة ينبت 
منها قمح معاه طماطم 
مش طواطم 
العرق مسك التواصل 
بين شعوبنا والأمم 
لو نبيع فينا الحضارة 
مين يزغزغ ف الهمم 
عودينا نكون سفينة 
قبطانها قلبه م البياض 
ما بانمشى من حمله التقيل 
وعيون بتمخر ف القليل 
ما يهمهاش غير كسر ضهر
الانتهاض
ما يهماش مين اللى باض
الفرخة واللا الديك 
ولا رعشة الانتفاض 
عودينا السحر طلسم 
وان حب تراب بلادى
هو بلسم 
وان لم الشوق ف سلة 
ويا فلة 
بكره فيهم 
عودينا عودينا 
الشاعر وحيد راغب عضو اتحاد كتاب مصر