جارى التحميل
استخدم زر ESC أو رجوع للعودة
نزلت بحر العيون
للشاعر : محمد ضباشه
نزلت بحر العيون
وسفن الحب حاملنى
لقيت عيون الناس
على الشط كارهنى
وكل مراسى العيون
بتحكى للزمن عنى
نزلت دموعى موج
ريحها ما طمنى
حتى شراع السفن
أخرس ما علمنى
خديتنى موجه بريئة
وقربت بالعيون منى
وقالت لى تعالى هنا
ليه بس تهجرنى
فيه عين بتسرق حياة
وعين تفضح ما تسترنى
وعين تكره وجودك
وعين بالبصه تقتلنى
وعين جواها حريقة
منها يارب سلمنى
أوعى تروح عندهم
وتعالى كلمنى
لقيت عيونها حنان
وبأمان الرمش تسحرنى
رميت نفسيى فى حضنها
لقيت رمش العيون شالنى
وسفن المحبه رست
على شط يسألنى
أيه جابك بحر العيون ؟
ونصيبك هنا عندى
ربنا نجاك منهم
فخاب فى حبهم ظنى
