علي طريقة الخال 
الغربه 
.........................
عارف يا وَلَدِي الغربه كيفها 
عامله زي عروسه وحشه 
وإنت قابلها بعيبها 
عامله زي الشمس قاسيه 
في عز صيفها 
........................ 
لما كنت زمان بسافر 
كنت غاوي يا ولدي أعافر 
كنت كافر
بس مش كُفر بإله 
كُفري كان كُفر إنتباه 
إن قطر العمر ماشي 
وإني ناسي إلاتجاه 
............................
تعرف يا ولدي 
لو يعود العمر بيا 
هرفع علي نفسي قضيه 
إزاى رضيت القطر يمشي 
وإنت تبعد عن عنيه 
...........................
الغربه قاسيه وناسها ناسيه 
إن وراها خلق عايشه 
والزوجه لما يغيب راجلها 
بتبقى دايخه 
بتبقى في عيون الديابه 
رحيتها فايحه 
شايفه الطمعانين في حالها
اللي غاوي يشوف جمالها 
وإللي بيدادي في عيالها 
بتبقى دايخه 
خايفه يسقط منها شالها 
عامله فيها ١٠ رجال 
وهي شايخه 
...........................
ولا وَلَدَكْ لما العيال يضربوه
بيقى عايز يجري يشكيهم ل أبوه 
ولا لما ناس كبيره يشتموه 
تلاقي ديما يلعنوا ميتين أبوه 
أيه ذنب طفل بيتولد من غير أبوه 
ملعون أبوه 
..............................
مفيش حاجه إسمها الدوله الشقيقه 
يا ولدي مهما تكون غريب والغربه ضِيقَهْ
أيام كتير نمت فيها علي الرصيف 
كل الفصول كانت تعدي أشفها صيف 
وسعات خريف 
وسعات شتا ودا شيئ مخيف 
...................................
الغربه مهما تشوفها زينه 
هي تُرْبَهْ
ومهما نورها يزيد يا ولدي 
تبقى ضلمه 
ناس كتير متغربين 
نفسها ترجع يا ولدي 
بس خايفه الديانيين 
وناس كتيره يا ولدي تاهوا 
ونسيوا هما جم منين 
.................................
الغربه سيف يا ولدي 
علي رقبة فقير .
نفسه بحد السيف الرقبه تطير 
أمانه يا وَلَدِي لو تسافر 
خليك حريص
إياك يا ولدي تسيب وراك 
ناس كتير 
................................... 
بقلم / عصام دويدار