دنيا لازمها تشوفها بتوبها
شد حزام القلب وغطى
جزيرة كبيرة فوق ما الراس
وابدر غلة حبك فيها
وخلى فسيلتك تبقى مراس
شايل القلة حامل الفلة
درب شوقك
واطرح نغم العشق الطلة
لو موعودك بص ف عودك
يطمن لك
تحت الذرة وفوق الملة
انت الحلو وعسل الوردة
لسه عيونك حسب الطقس
تلف الدايرة
وتصبح شاردة
صحصح جو الشتا بالمطرة
توهوج فيها الشمس بنورها
يعدى القطر يشق الليل
بالمواويل
وبلاش م السحرة
حط ف ودن النوم الصحوة
قطرة بقطرة
هية جميلة الحقد نفعها
ويا لهبها
عرق الحب بيطرح مسك
قالها مقوقس مصر نسبها
ف قلب مارية
خصخص كل رياح بتحرك دمعة
وأمم كل سفينة بتحمل
نار تشعلها
جرعة بجرعة
كان فى جراب الدنيا حياتنا
وطبعا بعض شتاتنا
لو حبينا
هناك ..
وسط محيط اللوعة بنغرق
لو بصينا بدون مجداف
يا ابن الأرض عليك أوصاف
لو تخدمها تقوم وقفالك
بالانصاف
خدها ترعرع بين أضلاعك
زهرة فل
وياسمين.. جورى
ورياحين ضوعه بيفرح
مهما تحط تزين المطرح
هو موديل اليوم يبقالك
خال أو عم
هو الفيمس دخل الحتة
ما عاد يتلم
شملك ضاع فوق رامية قشك
لحم خدودك ياااااااه
سقط من وشك
ليه ف جزيرتك
بدل الزهرة بعيش صبار
حتى المية بتسفخ فيها
كصخر بصخر
نطاح وشجار
وكل سياحة ولها أوقاتها
الا جزيرتك بهرب منها كل عمار
شيل الموجة فوق من كتفك
واسرح بيها
ليل ونهار
غير وجه الخوف والرجفة
وتوبك لابيض وقت التار
علق ديسك حليم وفريد
ومتنساش عدوية والاسمر
وساعة العوزة
علق ديسك الراجل الاخضر
دنيا لازمها تشوفها بتوبها
مش لبسها البوصة
عروسة تبقى بروبها
ياااااااااااااااااه يا قليبى
إمتى هاترضى عنى وتبقى
حبيبى
وتنزل ليه شوية ...اتنازل
يوم تجري بى
زى حصان بيمخطر عنتر
ويحمحم له
لما الدم يسيل من عينه
دموع بتشور
لوحة السما زينها نجوم
واحنا لوحتنا
مليها هموم
روحنا فى بكرة انهار بتدور
عن منبعها
وتوصل بيه لمصب بيعزف
زى كنارى فوق م الغصن
رتل وابكى
لحد الفوقة تحمر خدك
يخرج منك عسس الجن
فنك لو ابداع راح يبقى
ثبوت مش ظن
عشم الشاعر جملة بصورة
تملى العين والراس بالفن
تغير شكل وتنشر حالة
خيال م العلبة مش متداول
والمتداول يعمل فاول
والغلاية تفور ما تحن
جلدك حكه بإيدك
يفضل دمك يملا وريدك
والنجماية ف فلكك تجرى
عمرك بشرى
طول فيه بالبركة هايطول
عبى حروفك حس ومعنى
نفضل نقرا ما تشبع روحنا
ما تتبرجش
تدى جديد على قد قاريها
وتنشع زى النور ف ثقوبنا
ما تتأخرش
الشاعر وحيد راغب عضو اتحاد كتاب مصر
