مجلة كل الخواطر:: جـشــع :: " بقلم الشاعر المبدع أ / حمدي صالح

( جَشَع )
السوق نايم 
والحال واقف
وانا قاعد مانيش شغال 
وعشان اظبط الدنيا 
والعجلة تلف 
علي عيشي لازم اجري
سالت يا جماعة بلدينا 
علي شغل 
نفخ صدره ...وقال عندي
انت شهادة والا صنايعي
وشروطه ابتدي يملي
و مقدما بخس حقي 
وزهيد الاجر كان اجري
جشع .. عرقي يقاسمني 
قلت .....لالا 
يا عمنا اكيد انت بتهز
قال لا ...وشك سمح 
وعن غيرك انا مبديك 
وعايز يلبسني العمة
وزي ما انا محتاجه 
هو كمان محتاجني
وسوّد الدنيا ف عيني
وف مجاديف تعبانة بيكسّر
بصمجي وعامل فاهم 
وقال في نفسه دا واد واقع 
واكيد هايرضي بالواقع 
وانا في وشه بتبسّم
بس دمي في العروق يغلي
علي شهادات وعمر راح مني
وعلي دم اهلي اللي انصرف فيها 
بتحسّر
وبفزلكة قال
يا جنتل ماشي
والا لسه ها تفكر
صيحيح احنا في ازمة
بس نفوس قبل فلوس
وقلت اتنازل ..
وايه يعني
ومسير الازمة ها تعدي
بس لاقيتها عاندتني
وما طاوعتنيش ابدا نفسي
قلت له لا اااااا...انا ماشي ،
ومعاك الشغل دا يحرم
انا استحق الذل
لو رضيت بالظلم
وانا ربي خلقني حر
يا ولاد بلدي
رخصتونا في الغربة بطمعكم
وبعيد عنكم ها تتعدل وتتيسر
( حمدي صالح )