( مجله كل الخواطر ) ( صرخة) بقلم المبدع / حمدي صالح

أنا طفل الشوارع 
وتحت الكباري سريري
وغطاي سما ربنا وهدمتي دايبكم
أنا كلب ضال 
ماليش صاحب 
واكلي من زبالتكم
انا اللي الدنيا فيه بهدلت 
ولعنت سلسفيل أهله 
والرحمة معدومة ماشوفتهاش منكم
ها اكون ايه
غير غل ع الارض يمشي
حرامي
بلطجي
شمام
كاره نفسي وكارهكم
ياسادة انا حثالتكم 
قتلتوا فيا الانسان 
والضمير
ومنكم الذل شوفته 
طب ليه راح أرحمكم؟؟؟؟؟؟
انا لاشي
ببيع مناديل في اشارة
وانا محتاجها انشف بها دموعي
انا المحروم ببيع نفسي برخيص
تمن لخاين او عدو
للقمة اسد بها جوعي
انا النكرة وسطيكم
الاهة جوة صدري قنبلة 
ماحد سامعها
بتتفرتك منها ضلوعي
نظراتكم ليا رصاص حي
من غير ما اموت بتقتلني
سامع لعنات في كل مكان تطاردني
كأني شيطان أجرب 
والكل بيبعد عني
كلكم قرفانين من شكلي وريحتي 
وسؤالي ذنب 
لو قلت لييييييه يارب ؟؟
طب أقتل نفسي وأموت كافر 
عشان مني أريحكم ؟؟؟؟؟
جربتوا في يوم كإنسان تعاملوني 
جربتو في يوم تضحكو في وشي
جربتو في يوم ترحمو قهري 
جربتوا في يوم ....
جربتوا في يوم ....
جربتوا في يوم....
تعاملوني كواحد منكم