جوايا حبه كركبه
بقـــــــلم تــــــامر النقـــــيب
**************************
جوايا حبه كركبه
حاجات كتير متلغبطه ومتشقلبه
وعاتمه ماليها حدود
وشويه هم وفقر دم
وسنين وجع متعقربه
جوايا حبة كركبه
وضلوعى ملياها الغبا
وحلم عمر خايف يروح
وحب كان شال الجروح
ساكن كيان شريان وروح
ياويلى لو يحصل غلط
وأغلط وتبقى غلطه منى مهببه
جوايا حبة كركبه
شويه حاجات متلخفنه
أحزان قديمه مكفنه
وهموم على جراح البشر
فيهم غلابه ومساكين
نايمين بطين صاحيين بطين
وفرقه فيهم ملاعيين
وقلوب بظلم مغيمه
جوايا حبة كركبه
رافضه طيبتى وقسوتى
ماسكه فيا فرحتي
وأمد إيدى للقريب
علشان أكون أخ وصديق
يقابلنى ليه دايما بحقد
ووشوش كتير متركبه
جوايا حبة كركبه
تاهت خلاص المركبه
والموج عِلي والبحر هاج
والرمل يزعق من حرارة الشمس
يتفرق على صخر الشطوط
والمركبه خربت خلاص
وملتها كل خيوط العنكبوت
وحاجات كتير بتقول سكوت
وحاجات كمان جوايا ليه متسربه
جوايا حبة كركبه
م الدنيا والظلم اللى فيها
والكُره بقى باين عليها
طول عمرها قدام وشوشنا مكشره
وكأنها متكدره
حتى ملامح كبرها
أهو بان عليهــــــا
وسنين تفوت واكبر معاها
ويبان على ضهرى الحِنا
وأفكارى منى مهربه
واحس شعرى والبياض
وبخاف أعيش عمرى سواد
وكل حاجه مغربه ومتعبه
جوايا حبة كركبه
جوايا أفكار لو أقولها
يقولو جن
ويقوله والله شكله خاب
يمكن نظن
ويقولو مجنون بالكلام
والشِعر بيطاوعه أوام
ده لو يقولو إكتب سلام يكتب سلام
وإكتب ملام يكتب ملام
وإكتب ياشِعر ع الحيارى
واللى تايهين ف الزمان
ورص حرفك ع الورق
وأوصف كمان غدر الجبان
وإكتب على مصر حبيبتى
كل شئ فيها خلاص راح وإنقضى
وإكتب كمان إنى عايش
جوايا حبة كركبه
تامر النقــــــــيب ,,,
