الأهل و الأحباب في دولة الإمارات.. لا تواخذونا يا جماعة.. فيه ولد سهانا و تسلل و احنا بره البيت و قعد يلعب في الأجهزة و يطلع بيانات خايبة زى وشه.. بس نرجع الدار و احنا حانوريله مقامه.. 

• الأهل و الأحباب في سوريا.. الناس المطحونة بين العذابين.. لا تؤاخذونا يا جماعة.. الشعب المصري لا يقطع جزءا من جسده.. 
 
• الأهل و الأحباب في أى حتة في الدنيا.. لا تؤاخذونا.. معلش.. إحنا آسفين احتياطي.. الله يعلم علاقتنا حاتتدرمغ مع مين تاني.. أصل فيه ناس عمالة تلوّش عندنا و تستهبل عن التصويب في الاتجاه الصحيح.
 
• البعدا في إسرائيل.. إحنا مش آسفين ولا نيلة.. جتكوا داهية تاخدكوا انتوا و حلفاءكوا اللي معرشين عندنا دول.. 
 
• بالمرة بقي و بجملة إحنا آسفين.. أنا آسفة يا مبارك.. أثناء التمنتاشر يوم بتوع الثورة اتأخرت انت في التنحي.. و يومها أسميتك بالنطع.. و استكترت قوي انك تركت الشعب طول التمنتاشر يوم يطالبك بالتنحي و أنت لا تستجيب.. لكنك في آخرهم اتنحيت أو تخليت او مشيت و خلاص.. فأنا آسفة إني سميتك نطع.. طلع فيه أنطع منك.. 
 
• فيه ناس منزعجة جدا من مشاهد تقبيل الأيادي و تلبيس الجزم.. و البوس و الأحضان و مباريات طحن الشفاتير الأوفر دي التي نراها من الاخوان.. طب و إيه يعني؟؟.. ما هو كورليوني كان بيتباس إيديه برضه.. و عصابات المافيا كانت تمارس القتل و السلب و النهب بنظام السمع و الطاعة.. و الأب الروحي عندهم هو هواه المرشد بتاع دول.. سلو تنظيمات ارهابية و عصابات دولية يعني.. فعاتي يعني يا جماحة.. 
 
• هؤلاء الذين يثبطون من عزيمتنا و يشيرون إلي أن الناس لن تصمد في الشوارع اذا ما دخل عليهم رمضان.. أحب أقولهم ان جيشنا الباسل و جنودنا العظام عبروا في العاشر من رمضان.. و الساعة اتنين الضهر يعني في عز عز الصيام.. و كان بقالهم ست سنين مرميين في الخنادق رمضان يشيلهم و رمضان يحطهم.. و لما عبروا كانوا بيهتفوا مسلم و مسيحي الله أكبر.. ما فعلا ألله أكبر في كل الأديان.. لا تكونوا عايزين تصادروا الكلمة دى كمان لحسابكم.. و يومها حطمنا خط بارليف.. و هدينا الحائط.. عقبال ما ندك خط مُقرييف و مُتخلييف و إرهابييف يارب.
  
• لا يحمل الاخوان فوق أكتافهم و علي كفوفهم فقط دم الشهداء.. لكنهم يحملون أيضا دم كل هؤلاء الذين ماتوا حزنا علي بلدهم.. صديقتي سمية الرقيقة.. كانت إبنة لأم عاشقة لبلدها.. ظلت تراقبها منذ بدأت الدولة في ظل حكم الاخوان تنهار و الأنوار تظلم داخل النفق.. لم يكن علي شفتي الأم غير عبارة " يا خسارة يا مصر " رغم أنها كانت فرحانة جدا في بداية الثورة.. مع بداية حكم المحروس بدأت الأم تدخل في صمت طويل.. و ظلت سمية تلاحظ كيف تشاهد الأم الأحداث و هي مصابة بخرس عاطفي تجاه وطنها و ذكرياتها.. كل حدث وضيع كان يترك خطا علي وجهها و يطفئ جزءا من نور عينيها.. حتي أسلمت الروح في صمت.. بلا أى مرض عضوي.. غير حزنها علي بلدها.. و ليست الوحيدة.. 
 
• من المشاهد التي أضحكتني حتي أوغمن علي.. مشهد محمد مرسي و هو يدخل الاستاد المغطي في يوم الزار الإغريقي بتاع قطع العلاقات مع سوريا ده.. و استعراض إحنا جدعان قوي و كتار أهو.. بتاع سبعتاشر ألف يعني.. و يلف فيه شوية و هو بيحيي الناس بتوعه و فرحان قوي بيهم و يكاد يسأل البويسة بتوعه صرفتولهم الوجبة و الا لسه؟؟.. كان يمر علي لافتات مكتوب عليها ارحل يا بشار.. هنا لم أستطع السيطرة علي الكركعة.. بقي يا راجل شعب بلد بحالها فيما عدا شوية مهاويس بيطالبك بالرحيل.. قوم انت تتمشي تحت اليفط دى بمنتهي الثبات كده؟؟.. و لا كأن الكلام ليك أصلا؟؟.. يا تري كنت بتقول لنفسك إيه ساعتها؟؟.. 
 
• فكرونا يا جماعة نبقي نعمل كشف هيئة للرئيس الجديد و النبي.. يعني هو مين و ابن مين.. عنده ملف تخابري في أى جهة أمنية و الا نضيف.. حسن السير و السلوك و الا أعوجهم.. خريج جامعات و الا سجون.. يحمل الجنسية المصرية هو و عيلته و الا كوكتيل انتماءات.. ذكي و الا غبي.. شايف نعمة و الا شبعة بعد جوعة.. بيتكلم لغات و الا دونت ميكس.. متعلم أداب حديث و بروتوكول و إيتيكيت و الا ضهر الجاموسة كان مداري بلاوي.. بيعرف ياكل بالشوكة و السكينة و الا بيلغمط بصوابعه و يعمل اللقمة ودن قطة.. و لما ياكل بيعمل هرم في المعلقة و الا بياكل نونو نونو.. و بيقفل بُقه و الا بيفندقه و هو بيمضغ.. و بيعرف يشرب شوربة و الا بيقيم الطبق علي حنكه و يدلق؟؟.. بيستحمي و الا مكتفي بالوضوء و يطلسق.. في المقابلات الرسمية بيخلي إيديه جنبه و الا بيسيبهم يتجولوا في أنحاء جسمه كأنهم لسه بيتعرفوا عليه من جديد.. و لما يروح بلاد الخواجات بيقابلوه كما يجب و الا بيبعتوله سواق ميكروباظ شايل يافطة عليها اسمه.. عنده شخصية و الا بيتشخط فيه.. حاجات كده يعني.. الاحتراز واجب برضك.. 
 
• عاصيم عاصيم.. نعم يا ريسو.. العيال دول مضايقينني و عمالين يقولوا حايشقلطوني آخر الشهر.. فين دول؟؟.. أهم هناك أهم.. اللي لابسين فلنات مكتوب عليها تًشقلُط دول.. أُمات كساكي علي روسهم.. و ماسكين كروت حمرا في ايديهم.. عمالين يشوحوا و يقولوا حايشقلطوني.. طب بتعيط ليه ما يشقلطوك يا عم.. انت إيه اولك من آخرك؟؟.. حاتتشقلط من هنا إخوانك حايزقلطوا غيرك.. مانتوا كلكوا بسم الله ما شاء الله صبه واحدة و فورمة واحدة جتكوا نيلة نفس الغبا و التلامة زي ماتكونوا واخدين الدكتوراهات بتاعتكوا دى من مصنع جبنة واحد.. ماتروحلهم يا خويا بتندهلي انا ليه؟؟.. مانا رحتلهم يا عاصيم.. لقيتهم لايصين زيي و ضاربين لخمة.. قلتلهم انتوا مش مصدرينني و قاعدين تشغلوني زى عرايس الليلة الكبيرة؟؟.. ما تعملوا حاجة.. لقيتهم ملهيين في تهريب فلوسهم بره و بيظبّطوا حايهربوا علي فين و برضه حايسيبوني.. خايفين علي روحهم.. عارفين ان الناس فاقسة ان مش انا المقصود بعيني.. أنا عبد المأمور.. يقولولي بوس نجاد من بقه أبوس.. قاطع سوريا أأقاطع.. و انا ولا فاهم حاجة.. أُقف جنبي انت بقي.. أقف جنبك إيه يا عم؟؟.. هو انا طايقك أشاسا.. انت رخو كده و مارق.. طريقتك ما بتعجبنيش لا انت ولا اخوانك دول.. أنا بعز الدمممم.. أموت في الدبح و التعليق.. بسمع صوت الرصاص في وداني كأنه مزيكة القرب.. أنا نفسي أموّت الشعب ده كله و أقعد ألعب في البلد لوحدي.. عايز أعوض يا ريسو.. ما شبعتش من شوية الفكة اللي موتتهم زمان.. و ولاد الكلب قطعوا عليا الشهوة و حبسوني.. إجري روح لصاحبك التخين اللي بتصدره دايما في الخناقات.. لأ يا عاصيم بقي.. ماهو كل مرة يبعت العيال بتوعه و يخلع.. فالعيال حرنت.. اتصدر انت بقي يا عاصيم.. أنا خايف.. 
 
• خلاص خلاص ما تعيطش.. يا ساتر.. بس علي شرط.. أعمل اللي انا عاوزه.. محدش يطلع يكذبني او يعلن أي اعلانات من بتاعة ده مش تبعنا و الكلام ده.. سيبني أهرتل بقي.. حارعبهملك.. افتحلي انت الطريق و سيبني أحس بالزعامة اللي نفسي فيها.. و لو الأنفار شحروا معايا ابعتلي شوية عيال م اللي فاضلين معاكوا.. عشان يملوا المكان كده و يهللوا.. اياك بقي تسيب عليا ظباط م اللي ضميرهم صاحي دول يقبضوا عليا و يقرفوني.. حاعملك مهرجان ذعر.. و الحساب يجمع.. 
 
• الحساب يجمع ازاى يعني؟؟.. طبعا يجمع.. حاشتغل ببلاش انا و الا إيه؟؟.. طب عايز كام.. لأ الموضوع مش فلوس.. أمال إيه.. أول ما اخلصك م الزنقة دى.. تستأذن.. أستأذن ازاي.. ترحل ياعم.. تنزاح من وشي بقي.. و ان ما انزاحتش يا عاصيم؟؟.. حاشقلطك أنا.. عادتنا و الا حانشتريها؟؟.. 
 
• دير مز باطرسون.. بليظ تيك يور بؤجه آند ليف أور كانتري.. يو أولويز ليسن تو زا رونج بيبول.. زيي آر أول لايرز آند زيي ويل جو تو زا فايرز.. وي زا ريل بيبول أوف زيس كانتري هيت يو.. بيكوز يو آر زا ديفلز آدفوكيت.. بط بليظ.. بيفور يو رايد زا ناقه و تشرخي.. تيك زروت هجاظي آند أول زا بلودي جانج ويز يو.. زيي ويل تيرن يور كانتري تو أنازر أفجانستان.. زن يو ويل تيست فروم زا سيم هاني.. بالشفا يا حاجة