وعشقت فيكى الوطن 
ف بداية المشوار
وبنيت براح م الأمل 
ورفعت ألف جدار
وانا لمّا جيت أسكنك
ضاع الوطن وانهار !!
********
العشق كان توبك وعنيكى ليّا بلاد
وانا كنت ف دروبك متحرر الأبعاد 
طار ف المدى قلبى فرشه بدفا حبى 
صار المدى قلبك والعمر كان له نهار 
وعشقت فيكى الوطن ف بداية المشوار
********
وبقيت لقلبك مدن كنتى غنا ليلى 
ولقلبى كنتى الوطن نبضك مواويلى
ساعة الدفا تميلى قمره ف سما ليلى 
ساعة الألم ويلى تبقى كما الأعصار
وانا لمّا جيت أسكنك ضاع الوطن وانهار !!
********
ضعيتى ليه الوطن صادرتى أحلامى
ولغيتى حدّ الزمن من قلب أيامى 
خنتى وكان التمن قلبى اللى مايخونك
وانتى ف عز الألم تلاقينى وسط النار
وعشقت فيكى الوطن 
ف بداية المشوار
وبنيت براح م الأمل 
ورفعت ألف جدار
وانا لمّا جيت أسكنك
ضاع الوطن وانهار !!