رغم اللي كُنّا .. وكان
أبداً .. مابعنا الوطن
ولا شلنا يوم الكفن ..
ورضينا .. بالعنوان
      ***
صفحات حكاية الوطن
مليانه .. بالأسماء ..
ناس لها بطولات
وناس لها كرامات
وناس بتحمي الوطن
في الشِدّه والأزمات
وبعض ناس في الوطن
شلّه .. مِن العصابات
فاكرين بأن الوطن ..
تكيّه .. للأغوات ..
لعبوا التلات ورقات
ووزعوا الهُتافات
وغيّروا الشعارات
وقسّموا انتماءات
اللي معاهُم .. فات !؟
واللي عليهم .. مات !
........................ 
وانتَ .. يامصري فَطِن
ياصاحب الوقفات ..
والرأي في أوقات ..
الهوجه .. والزلّات ..
إوعاك تخاف ع الوطن
طول ماحنا فيه عنوان
لكرامة الإنسان ..
واللي خانوا الوطن
مالهومش بنّا .. مكان
ومفيش غريب ع الوطن
يرفع في مصر أدان