كلامك على الصواب
ومصواب
كلامك كل حق
وف زماننا ما ابغى ابنادم صدق
ما كاين غير زوق اتبيع
حتى جفات
والرجلين احفات
لا شتى ولا ربيع
السم اركب الخلق
واتغيرت اطبايعو
وركبو الحمق
ولبس ادوالبو
ولكلام المصواب
اصبح للبعض اعذاب
حتى انزوق لوحتي
ولوحتي عند الطالب
والطالب ف الجنة
اصبح اليوم ف المحنة
فين الدواية ولقلم
والكراك سر لحفاظة
والصلصال والصمق
الله يرزقنا لهداية
الخير جفت امنابعو
واصبحنا للشر نتابعو
واحد واجد
وعلى الرديل نتجابدو
كيف يا راسي نتعقل
والعقل التقليد جابدو
ما اتليت نعزي اللي مات
ولا نتفقد جاري
ركباتنا صدمات
ولا عدت داري
انسايم الصدق طارو
حتى اصبح كلها ودارو
لا خو يحن ف خوه
ولا ولد يرضى ببوه
فين هي لعناية
ما بقات معاك ولا معايا
جرنا حبل ارهيف
بكل عقدة ولفيف
مرة مرة يرمي فينا واجد
ولا فقنا كلها يتجابد
لكلام المصواب
ما ابغاتو لعباد
وكلام الحق لثموه بنقاب
وما كاين غير جبد يا جباد
كلها كيف اتكوى
وكل كيف جبداتو
اتسلحنا بلخوى ولهوى
وكل رجليه فين اداتو
لا تحسبني ساير انزعبل
جارا الجمال والجمل
فيق يا السابت ف اوهامو
لعمر صفقة ما يطول ادوامو
خمم الف تحميمة وتخميمة
وعاتب نفسك على كل تزميمة
ما شي وحدك
ما اتهيمك اخلاست الليل
هذا بعدك
على راسك الف قنديل وقنديل
كون الليل ستار
ما يعريه ضو الصباح
وكون النهار نهار
ما تغرب شمسو ع الايضاح
ولكلام المصواب
ف السنة ولكتاب
امدرجا امعالمو واضحة
نقطة اعسل سايحة
احلاوتها تشفي كل اعليل
وف سوق الخير اتعز كل ادليل