نفسي حلمي يكون زي الناس بسيط اصحى من نومي اروح شغلي نشيط و امشي جنب الحيط لساني مش سليط و انسى كل الشعارات اللي خلتني عبيط و احلم اني أرضي أمي بالنجاح المصطنع و ابقى زي باقي شعبي.. شاب سهل ممتنع و لا افكر و لا اقرأ.... اصل تفكيري دلع و بسياسة النظام لازم اكون مقتنع و اللي حبيتها سنين هنسى حبها أكيد و هشوفلي عروسه حلوه عمرها سنه أو يزيد و اهو على بال ما تكبر أشتري بيتنا السعيد و العفش نجيبه قسط مش ضروري يكون جديد و أبتدي حياتي السعيده و انا سني اربعين و لا هكفر يوم بحالي و لا مره هبان حزين اصل انا شاب مكافح و جوا مني ايمان متين ان سكوتي سلامه و ان طاعتي فرض عين و اكيد بعد الجواز راح افكر في العيال بس هنأجل شويه جايز الحال يبقى عال و العمل مش بالشهاده المهم يكون حلال كدا كدا الصحه فانيه أهم شئ الأحتمال هيا يعني فيها ايه لما اتعبلي يومين ؟! هشتغل ليلي و نهاري.. يعني كنت هجيب مينين و أرجع اخر الليل مطاطي و يقابلني البيه الأمين و بعد تفتيشي ياكلني على قفايا قلمين و انا طبعا هشكره و على وشي ابتسامه بس حقي اكيد هيرجع لما تقوم القيامه تور انا و ربطوه في ساقيه و على عينه غمامه راسي مغروسه في مشاكلي و جبان زي النعامه و ارجع البيت و أكيد كبتي هيكون ع المدام قال ايه بنت الأصول عايزه من جوزها غرام مش كفايه هد حيل دا انا بالعافيه انام و كفاياكي مصاريف قلتلك شدي الحزام و الوليه اكيد هتصرخ و الجنان هيبان عليها مصاريف ايه يا حيلتها عيشه زفت و راضيه بيها و بنتك اللي راح نظرها و عايزه نضاره لعينيها و انا اسكت غصب عني للمدام تطول ايديها و تعدي الليالي و لسه حالي هوُه .. هوُه حزني ساكن في خيالي.. مكسوره نفسي بقوه و انسى اصول الشهامه و انسى معاني المروه و انسى وطن شلت همه و يبقى حلمي بس لقمه و الشيطان يلعب بعقلي و يقولي يا غبي اسرق. انهب. اختلس انت بشر مش نبي و ان ضعفت تكون نهايتي في السجون اني اترمي و ان قاومت بأيماني من كتر فقري هنحني لا كفايه اعذروني حلمي انا غير حلمكم انتوا ساكتين على حالكم و ارتضيتم ذلكم و انا لسه صمودي قادر و رغم اني منكم حلمي وطن اشوفه عالي و عمري ما هخاف زيكم
