أحلامى أنا سردتها
قدام عنيا اليوم
انا كنت باحلم
يا ناس
صوتى يعلى ف يوم
واقول للفساد ينتهى
ونصحى بقى م النوم
إنى ابقى حُر ف ارائى
واعيش كريم ف القوم
ما اكونش تايع
واقبل فتات
وأقول دى نعمه تدوم
أعيش الأمان ف بلادى
وحقى الأصيل مفهوم
يحكمنا حاكم بيفهم
انه بشعبنا ملزوم
مش سيف على رقابنا
واحنا عبيد فى القوم
وصحيت النهارده
والصوت
عالى فى كل مكان
شباب بيهتف ينادى
أنا حر فى الميدان
عايز اعيش من غير
واسطه ورشوه كمان
ألاقى شغله شريفه
وأعيش ف يلدى بأمان
وصوتى يبقى له معنى
ويكون لى قيمه و كيان
شباب اتحدوا الرصاص
وافترشوا أرض الميدان
راح منهم كتير شهداء
دفعوا تمن الأمان
لكن الغريبه ف ناس
عايزه توقف حلمى
عماله بتصحينى
وبتنهى لى أملى
وتناسوا دم الشهيد
اللى زودت ألمى
الحلم مش ح اوقفه
لازم اكمل حلمى
لازم يا ناس الثوره
تكمل تحقق هدفى
ما يغروكش الوعود
دى لعبه معروفه
بيغيروا ف الوجوه
واللعبه مكشوفه
يمشوا راس فاسده
ويجيبوا ناس موصوفه
عشان يقووا النظام
يرجع بنفس ظروفه
ويعيد زمام الامور
لفساد نعيشه نشوفه
احنا قتلنا الفساد
ومش حنرجع تانى
حاقول لكل العباد
مش راح اسيب مكانى
لابد أنهى النظام
لابد أعيش زمانى
حُر ف أمان وسلام
احمى بيها أوطانى
وبدأت م الميدان
عزم الشباب قوانى
إيدى ف إديكوا حنبنى
أساس بلد آوانى
نشيد عليه عمارات
حب وصمود وتفانى
