بالعربي المشبرح
وبالفلسطيني كمان
-----------------------
مساكوا دحنون
وزيت وزعتر وزيتون
وكاسة شاي على
حطب الطابون
وعود ميرميه ويانسون
بدي احكي ب المشبرح
وأَجري على الله شو بدكوا
تقولوا عني قولوا لان ستي الله يرحمها
كانت دايما تقول :
يا ستي... اللي بحكي الصراحة الناس بتفشخوا
الله يرحمك يا ستي بس انا بدي احكي ب المشبرح
بنشوف كثير بالعالم الافتراضي وبهالمواقع ناس بتحمل القاب
اشي استاذ ... اشي أديب ... اشي شاعر مخضرم
اشي طبيب ... اشي كاتب ... اشي ناشر
وإشي وإشي وإشي ما ضل لقب الا سمعناه او قراناه
يا ويلي عليك يا اصمعي ويا ابن المقفع ويا ابن خلدون
ويا جرير يا ويلي عليك يا عَقّاد ويا منفلوطي
ويا طه حسين واحسان عبد القدوس يا ويلي عليك يا نزار
ويا محمود درويش ويا سميح القاسم ويا فارس شدياق
ومي زياده وفدوى طوقان والله ضوعوكَوا بهالمواقع
وسبقوكوا بأشواط الأدباء والكتاب والأطباء والدكاتره
يا خي وين كانت هالمواهب متخبيه
والله ما عارفي وين، يا ريت تدلونا وين كانت
اااااااخ يا علوم الطب والبلاغه وبحَور الأدب
كيف غرقوا فيكي وغرقوكي
اااااخ يا بحور الشعر شو غاصوا بقلبك حتى نشفتي
وين إيام زمان يا ستي كان الواحد ان مدحتوا
الناس يستحي ويخجل ويتواضع
اليوم لو تشوفي يا ستي الالقاب والنياشين وشهادات التكريم
وصار الواحد هو يمدح نفسه بنفسه
ويلا يا مواقع اعطي نياشين هو حدا سائل
صحيح ياستي والله الحق معك لما كنت تقولي
فلان لابس ثوب جديد بس مهبط عليه
عرفتوا شو يعني مهبطاقلكوا شو؟؟
أو يلا خليها بلا تفسير
مش هيك؟؟
مبلا هيك
والف هيك ونص
نسمااااااااات
بقلمي
تغريد الحاج
