<!--
<!--<!--<!--<!--
ماهيش حاله
دي ميت حاله
ملاك ف القلب رحّاله
كما ضي النهار لمّا
يلف الكون
وانا دايما باكون مجنون
بكل مافيها من تفاصيل
يهل الليل ..
أشوفها ملاك وله جناحين
واشوف ف عيونها نجمايتين
يرشوا النور ع الضلمه
ف تتحوّل شوارع ضي
واشوف ف جبينها فجري الجي
وترنيمة أدان لبلال
بتوصل للسما الأولى
وتركب فوق جناح غيمه
وترميني برزاز مطره
تحوّط كوني بالخُضره
وتغسل قلبي م الأحزان
حبيبتي بتشبه الكروان
ف لحظة لو تناديني
وباسمع صوتها يحييني
والاقي حروفي تتحوّل
لكونشرتوا بصوت الطير
حبيبتي زقزقات عصافير
ف وقت الصبح بتنقّر
على الشبّاك عشان اصحى
وتفردلي الجناح فُسحه
تاخدني لعالم الأساطير
بدون تفكير ...
أروح ويّاها للجنّه
وأتمنى النهار يمتد
عشان تفضل ملامحها
قُصاد عيني فراشة نور
لكن لمّا النهار بيدور
وييجي الليل
باشوفها ملاك وله جناحين
واشوف ف عيونها نجمايتين
يرشوا النور ع الضلمه
ف تتحوّل .. شوارع ضي
سيد منيرعطيه
