حزين ياللى تفتكر أن دنيتك وياك
ما هى زى ما بتفرحك بتفحر غدرها جواك
وتبدل دموع الفرح بأنهار من دموع شكواك
وأنت عبيط وأهبل وفاكرها بتجرى وراك

حزين ياللى تشترى نفسك وترمى وراك الناس
وفاكر انك هتعيش لوحدك بلا قلب ولا أحساس
جدران الموده فى قلبك مالت لأن ماليها أساس
وساعتها هتكون ولا شيىء وتحت النعال تنداس

حزين يا توب يا ملفوف على الجسم بالى
شابت خيوطك معايا وكنت ساتر حالى
بقى بعد الزمن ده أرميك وأدور على الغالى
دأنت يا توب عمى ومقامك من مقام خالى

رميت همومى فى بحر الهم رجعت ليه من تانى
غضبانه انى رميتها وكأنها أجمل ست عشقانى
قلتيلها سبينى الله يسترك وكفايه عليه أحزانى
حلفت ما تسبنى لوحدى وتفضل معايا كويانى

طفى بماء الصبر نار الشك والغيرة
وبلاش تمشى فى شارع تكون اخرته حيره
وأختار الصديق الوفى قبل الأهل والجيرة
وكل تأخيرة يا صاحبى أكيد هيكون فيها خيره

زرعت بذور الأمل جنب شجر صبار
وكل ليله اطل عليها ما لاقى فيها ثمار
ويصعب عليه أشوف بتاكل فى جدورها النار
وشجر الصبر طارح يأس يتمنى يشوف له نهار

عديت على شارع الحبايب لقيته حاره سد
عليه غضب ربنا ومافهوش طوبه جد
والناس لابسه قناع ماعرفت منهم حد
حتى اللى كانوا حبايبى اتشدوا جواه شد

مشيت فى طريق الجد طلع أخرته ضلمة
والناس أتفرقت بين مطرب وبين عالمة
اللى يقول العنب واللى ترقص على الوحده والضمة
خلونى كرهت الجد وعملت له من النفاق عمه

ياللى تماشى الخسيس بالخسه راح يلقاك
تمد له يدك ويده ما تلقيها معاك
يطلع على اكتافك لفوق ويحرقك بنار شكواك
ويدوس عليك بالجذم ولا يرحم ساعتها بكاك

قالولى الحب حلو أنا قلت فين ألقاه
ما أنا ياما حبيت ودقت من حلاوته الاه
ونار الهجر جرتنى ورمتنى وراه
ولا يمكن أنتوا شايفينه وعيونى مش شيفاه

كلام مش صحيح اللى تقولك ان انا عشقاك
وبسهر طول الليالى أتمنى أكون وياك
كدابه فى أصل وشها دى نايمة وأكيد نسياك
وأن غبت عنها يومين تقفل ببانها وراك