مش اول مره
يضيع من لمسة ايدي حبيب
وملامحه في عيني
قمر ما يغيب
بتاخدني الفكره لذكري قديمه تحيرني
في ما بين امبارح
كان طارح
عصفور في الدار
بجناح دوار
بيرفرف عمره
ويفرفر
وف لحظه اهو طار
فمحدش ياخده من حضني
ويقول لي اهو مات
انا شايفه في جنة احلامي
وشفايفه بتضحك قدامي
اجمل نغمات
وانا نايم
يلعب لي ف شعري
وصوابعه صغار
اتغطي بروحه ف احلامي
دا اعز حبيب
من بعد رحيله للجنه
وقلوبنا ف نار
اقري له الفاتحه واحيانا
عن وعيي بغيب
انا نفسي اكتب لك
مشتاق لك
انا جي قريب
والوجع الطالع من ليلي
بيشق اهات
والقلب بينزف بحروفي
والورقه بتحبل بالكلمات
وساعات اشتاق لك
انده لك
القاك تدخلني في احلامي
والكل ف عطشه بيعاني
تسقيني حليب
استطعم واما احضن طيفك
يتبخر عطرك ف عروقي
وف لحظه تغيب
يا اعز حبيب
(تنهيدات صلاح يوسف)
ذكري المرحوم محمد علي يوسف
موضوع الديوان (عصفور الروح)