منتهى اللذّه  ...من ديوان منتهى اللذه
..............
ولسّه الحب جوايا
طيور جنّه

ولسّه يا روحي بتمنّى
أكون جنبك

ما زال كل المُنى حُبك
ف ليه شايفك ...

ف عز نهاري بتشدّي
خيوط الشمس للمغرب؟

وليه لحظة ما اقربلك
ألاقي نظرتك تهرب؟

وليه سايبه الغرام يتعب
بطول البُعد؟

دنا قلبي جناين ورد
زارعهالك حروف أشواق

وبسقيها بقناني الود
وانا أول ما اقوم م النوم

بقول إسمِك متين مرّه
كأنه فوق لساني وِرد

ف ليه وقت انهمار الشوق
بتبني ف الطريق السد؟!

تعالي نزغزغ الأحلام
فتضحك والغرام يتمد

دنا عمري ما خونت العهد
ولا بصّيت على غيرك

واشوفك حلم جوّه الحلم
وانام أحلم بتفسيرك

وتفضل منتهى اللذّه
ف لحظة لمّا اقوم م النوم

واشم النسمه بعبيرك
ف ليه دايما بشوفني بعيد

وخارج برّه تفكيرك؟
وليه وقت ابتسام الروح

بترمي عليها تكشيرك؟ّ
دنا عمري ما كنت مُباح

سوى ليكي
وطول عمري بغنّيكي

بلحن يميل على حُسنه
جموع الإنس ويّا الجان

ولا عمري داريت الشوق
مابين الصمت والنسيان

أنا إنسان

بيملاني الحنين ليكي
ويرسم صوره بالألوان

وتفضل ضحكتك مطره
وانا قلبي الكبير فيضان

وشايفك بين عيون الحور
وشايفك نور

ولو كاس الفراق بيدور
بقوم اعمل عليه عِصيان

تعالي وخُشّي جوايا
هتلقي الحب ف الشريان

ولو كان الغرام جنّه
أنا واقف هناك .. رضوان

بقلم / سيد منيرعطية