يا صاحبى كلمات اسامة فؤاد حنا
يا صاحبى خليك حريص
اوعى تصاحب يوم خسيس
ده ف لحظة ممكن يبيعك
ولو كنت غالى بالرخيص
بلاش تجرى ورا احساسك
وخلى عينيك وسط راسك
ده الخسيس مالهوش كرامة
ولا يستاهل كعب مداسك
حسود وحقود ويغير منك
طمعان حتى ياخد اسمك
اوعى ف يوم تخدع نفسك
وتفكر انه ف يوم هيحبك
قالوا فى الامثال زمان
الخسيس مالهوش امان
يعمل نفسه قال بيحبك
ويلدغك فجاة زى التعبان
سبحان الوهاب العاطى
لمايدى ويوهب واطى
واللى كان عشان مصلحته
يبوس الايادى ويطاطى
يا صاحبى م الدنيا اتعلم
للخسيس اوعى تسلم
وتشمت فيك انسان جبان
عايزك على طول متالم
خد من الخسيس عبرة
وازاى ف يوم خان العشرة
كنت فاكره اعز الناس
ودلوقتى ما لهوش ذكرى
افهم يا صاحبى العبارة
الدنيا مكسب وخسارة
الدنيا مش دايمة وغدارة
واللى سقاك ف يوم المر
راح يدوق نفس المرارة
