عصفور عارفني *** بقلم السيدابوطاحون
*********
عصفور عارفني
ديما يزورني في القفص
فاكر كويس
انا اللي طالقه م القفص
*********
اول ما طار
لف وفحص
وقف على فرع النهار
زقزق رقص
لقى الهوا غير الهوا
والنور كمان
غير اى نور
جلجل سرور
والضحكه
في حضن المدى
متسيده ومتمرده
لا خايفه ولا متردده
عمره ابتدي
بره القفص
*********
عصفور اصيل
لما لقاني مطرحه
بكى وانفطر
بنى له عش ع الشجر
جنب القمر
ما خافش حد يجرحه
او يدبحه
*********
وف كل يوم
من النوم يقوم
يعوم بين النجوم
وهى مروحه
أمد له ايدي
يداعبني
كما ابني
ويلاعبني
يبوس قلبي
يرقص حواليه
بشوق وحنيه
يطمني
إن الظلام
عمره ما هزم النجوم
وإن الهواء
والهوى والنور
مهما يكون السور
ما بيخافوش سجان
ولا قضبان
وان الخضار
ديما يهد البور
يحكي لي
حدوتة الحريه
ويغني اغنيه
بكره هتطلع شمسنا
أكيد ..
ونكتب سطرنا
يا سلام ..
و حكمة ربنا
دا كل قلب
وله قفص
لكنه بيدق بمزاج
وحريه
*********
#عصفورعارفني
#السيدابوطاحون
#الأخنوم
